Собиқ сиёсий маҳбус Анджей Почобут Беларусга қайтди
Беларус қамоқхонасида қарийб беш йил сақланган ва 2026-йил апрелида маҳбуслар алмашинуви доирасида озод этилган журналист Анджей Почобут Беларусга қайтди. Полша ОАВга кўра, у мамлакатда етти кун бўлиб, оиласи ва ҳамкасблари билан учрашишни режалаштирган.
Собиқ сиёсий маҳбус Анджей Почобут Беларусга қайтди
Беларусда собиқ сиёсий маҳбус сифатида танилган журналист Анджей Почобут 8-сентабр куни Полша–Беларус чегарасидаги Бобровники назорат-ўтказиш пункти орқали Беларус ҳудудига кириб келди.
Почобутнинг ўзи ҳам Х ижтимоий тармоғида Гродно шаҳридан сурат жойлаштириб, унга поляк тилида «Неман бўйида» деган изоҳ қолдирган.
Полшанинг ПАП ахборот агентлиги махсус хизматлар маълумотига таянган ҳолда, журналист чегарадан бир аёл ҳамроҳлигида ўтганини хабар қилди. Газета Вйборсза нашри маълумотига кўра, Почобут 8-сентабр куни эрталаб Полша–Беларус чегарасини кесиб ўтган.
Журналистнинг Беларусда етти кун қолиши режалаштирилган. Шу вақт ичида у оила аъзолари ҳамда Беларусдаги поляклар иттифоқидаги ҳамкасблари билан учрашмоқчи. Газета Вйборсза журналисти Бартош Велинский бу сафарни «мутлақо шахсий» деб атаган. Маълум қилинишича, Беларусдан кейин Почобут АҚШга йўл олишни режалаштирмоқда.
Беларус раҳбари Александр Лукашенконинг танқидчиси бўлган Анджей Почобут 2021-йил июнидан бошлаб қамоқда сақланган. 2023-йилда Беларус суди уни саккиз йилга қаттиқ режимли колонияга ҳукм қилган.
2025-йил октабрида Европа парламенти Почобутга Андрей Сахаров номидаги «Фикр эркинлиги учун» мукофотини берган.
2026-йил 28-апрелда эса Почобут Беларус, Россия ва Европа Иттифоқи ўртасидаги маҳбуслар алмашинуви натижасида озод қилинган. Озодликка чиққанидан кейин у Полшадаги Белосток шаҳрида яшаб келаётган эди.
Қизиғи, Почобут Беларусга қайтишда фойдаланган Бобровники чегара пункти Полша томонидан айнан унга ҳукм чиқарилганидан кейин ёпилган эди. Кейинчалик унинг фаолияти қайта тикланган.
Почобут озод этилганидан кейин кузда Беларусга бориш нияти борлигини айтган. Дастлаб у Беларусдаги поляклар иттифоқи сьездида иштирок этишни режалаштирган, бироқ мазкур тадбир 2027-йил баҳорига кўчирилган.