Сўнгги банк автоматини йўқотаётган шаҳарда бепул банкомат ўрнатиш талаб қилинмоқда
Ҳисоботда Йоркшир-Дейлс шаҳри учун бепул банкомат тақдим этилиши тавсия этилган.
Сўнгги банк банкоматидан маҳрум бўлиш арафасида турган шаҳарчада бепул банкомат ўрнатиш талаблари кучаймоқда.
Хоус (Hawes) шаҳридаги Barclays филиали 2019 йилда ёпилган эди, бироқ ундан фойдаланиш бепул бўлган пул ечиш аппарати ўз жойида қолганди.
Эндиликда, мустақил таҳлил аҳолининг нақд пул ечиб олиш имконияти сақланиб қолиши кераклигини кўрсатганидан сўнг, Йоркшир-Дейлс шаҳарчасида доимий бепул банкоматни таъминлаш чоралари кўрилмоқда.
Шу ой бошида Barclays ўз банкоматлар тармоғини қайта кўриб чиққандан сўнг, Буюк Британия бўйлаб 132 та аппаратни, жумладан, Хоусдаги собиқ Barclays биносида жойлашганини ҳам олиб ташлаш ниятида эканини маълум қилди.
Бироқ LINK банкоматлар тармоғи бепул банкомат тақдим этилиши кераклигини тавсия қилди, чунки бу қадам шаҳарчани ушбу қурилмасиз қолдиради.
Кенгаш аъзоси Ивонн Пикок (МВЕ) агар бепул банкомат бўлмаса, бу «дахшатли, мутлақо дахшатли» бўлишини айтди.
«Бизда айрим дўконлар ва ҳудудларда фойдаланиш учун доим ҳам карталар бўлавермайди, бундан ташқари, улардан фойдаланиш тадбиркорларга пул туради», — дея қўшимча қилди Консерваторлар партияси вакили.
«Шу боис, бу ҳудудга келадиган сайёҳларга нақд пулдан фойдаланиш имконияти жуда зарур.
Кирби Стивенгача 13 миль (21 км), Ричмондгача эса 27 миль (43 км) масофа бор, шундай экан, биз нақд пулни қаердан оламиз?»
Шимолий Йоркшир кенгаши аъзоси Ивонн Пикок одамлар нақд пулни осонгина ечиб олишлари маҳаллий корхоналар учун муҳим эканини таъкидлади.
Ўз ҳисоботида LINK алмаштириш хизмати одатда баҳолашдан кейин уч ой ичида ва мавжуд қурилма ёпилишидан олдин ишга туширилиши кераклигини билдирди.
Шу билан бирга, Ричмонд ва Норталлертон округидан парламент аъзоси ҳамда собиқ Бош вазир Риши Сунакнинг идораси Barclays компаниясидан амалдаги банкомат муқобил чоралар тайёр бўлгунга қадар очиқ қолиши ҳақида кафолатлар олганини маълум қилди.
LINK ташкилотининг билдиришича, жойлашуви ҳали тасдиқланмаган янги хизмат ўз аъзолари номидан банкоматлар тармоғи орқали молиялаштирилади.
Лейберн ва Каттерик Гарнизон шаҳарчалари ҳам Barclays банкоматларидан маҳрум бўлиши кутилмоқда, бироқ бу иккала шаҳарда аллақачон муқобил бепул банкоматлар мавжуд.