Синглисининг тўйига бормаган Бурак Ўзчивит, шошилинч операция қилинган Керем Бурсин: турк кино оламининг энг шов-шувли воқеалари
Синглисининг тўйига бормаган Бурак Ўзчивит, шошилинч операция қилинган Керем Бурсин: турк кино оламининг энг шов-шувли воқеалари
Август ойи турк сериаллари оламида одатдагидек кутилмаган янгиликлар, машҳурларнинг шахсий ҳаётидаги ўзгаришлар ва шов-шувли воқеаларга бой бўлди. Қуйида ёзнинг сўнгги ҳафтасида юз берган энг қизиқарли ҳодисалар ҳақида маълумот берилади.
**Синглисининг тўйида иштирок этмаган Бурак Ўзчивит**
Таниқли актёр Бурак Ўзчивитнинг синглиси Бурчун Бафралик Ҳасан Сағдичга турмушга чиққани маълум бўлди. Тўй маросими Бафрадаги Элит Гарден мажмуасида бўлиб ўтди. Бироқ, маросимга машҳур актёрнинг ўзи ва рафиқаси Фаҳрие Эвжен келмагани журналистлар эътиборини тортди ва тармоқларда турли миш-мишларга сабаб бўлди.
Маълум бўлишича, эр-хотин сёмка жараёнлари ниҳоятда тиғиз бўлгани сабабли тўйга бора олмаган. ОАВ ва интернетда актёрга нисбатан танқидлар ёғилгач, Ўзчивит ҳейтерларга қуйидагича жавоб берди: “Нега бунчалик бағритош бўлиб кетдингиз? Бутун оила бахтиёр, ёш келин-куёв шод-хуррам бўлиб турган бир пайтда, нега уларнинг дилини хира қилишга уринасиз, ўзингиз тўқиётган уйдирмаларни ўз шахсий ҳаётингизга татбиқ қилинг, оиламизни тинч қўйинг”.
Кейинчалик Бурак синглиси ва куёвини видеоалоқа орқали қўнғироқ қилиб табриклагани ойдинлашди.
**Сила Туркўғлу унаштирилди**
Турк актрисаси Сила Туркўғлу тадбиркор Ата Айилдиз билан унаштирилди. 28-август куни ўтган маросим фақатгина энг яқин қариндошлар ва қадрдон дўстлар даврасида бўлиб ўтди.
Баъзи мухлислар актрисани аллақачон турмушга чиққан деб ўйлашарди, бироқ унинг дўстлари асосий тўй ҳали олдинда эканини айтишди. Аввалроқ оила қуриш ва она бўлишга тайёрлигини тан олган актрисанинг тўйи яқин кунларда бўлиб ўтиши кутилмоқда. Мухлислар эса қизиқарли бир тасодифни пайқашди: актриса 2024-йилда синглисининг тўйида келин гулини тутиб олган эди, 2025-йилда йигити унга турмуш қуришни таклиф қилди, 2026-йилда эса улар расман унаштирилди.
**Мурат Йилдирим иккинчи бор ота бўлди**
Таниқли актёр Мурат Йилдирим ва унинг рафиқаси Иман Албани иккинчи марта ота-она бўлишди. Жуфтлик фарзандига Керем исмини танлашди.
Чақалоқнинг аниқ қайси куни туғилгани ва туғуруқ қаерда бўлгани сирлигича қолмоқда. Эр-хотин чақалоқ билан тушган илк суратларни шифохонадан чиққач, уйларидан туриб интернетга жойлади. Эслатиб ўтамиз, жуфтликнинг 2022-йилда туғилган Мирай исмли қизи ҳам бор.
**Олти нафар турк актрисаси дунёнинг энг гўзал аёллари рейтингига киритилди**
Нетизенс Чоисе журнали дунёнинг энг гўзал аёллари рейтингининг йиллик натижаларини эълон қилди. Бу гал энг кучли йигирматаликка бирваракайига олтита турк актрисаси кирди.
Сила Туркўғлу рейтингда 2-ўринни, Яғмур Юксел 3-ўринни, Су Буржу Жошкун эса 5-ўринни эгаллади. Шунингдек, Илсу Демиржи 8-ўрин, Жемре Арда 9-ўрин ва Синем Унсал 19-ўринни банд этди. Рейтинг сайт фойдаланувчиларининг овозларига асослангани учун кўпроқ интернетдаги одамларнинг шахсий фикрларига таянилган. Шунга қарамай, Сила ва Яғмур кетма-кет бир неча йилдан бери ушбу рейтингнинг биринчи ўнталигига кириб келмоқда.
**Керем Бурсин шошилинч операция қилинди**
Таниқли актёр Керем Бурсин август ойининг сўнгги ҳафтасида шифохона палатасидан суратлар жойлаб, мухлисларини анча хавотирга қўйган эди. Маълум бўлишича, у жарроҳлик амалиётини бошдан ўтказган.
Турк ОАВсининг маълумотига кўра, шифокор текшируви пайтида Керемнинг ўт пуфагида кичик ўсимта аниқланган ва шу сабабли уни тезда операция қилишга тўғри келган. Жарроҳлик амалиёти яхши ўтган ва ҳеч қандай кутилмаган асоратлар бўлмаган. Касалхонада актёрнинг ёнида яқин дўстлари, мураббийси ва менежери туриб, уни қўллаб-қувватлашган. Ҳозирда актёр уйида дам олиб, соғлигини тикламоқда. Сентябр ойида актёр Германиянинг аксессуарлар бренди рекламасида суратга тушиш учун Ню Ёркка учиб кетиши керак эди.
**“Қизил шарбат” сериалида кутилмаган бурилиш: Нилай персонажи янги мавсумда фожиали тарзда лойиҳани тарк этди**
Актриса Фейза Живелек томошабинларнинг севимли лойиҳасига айланган “Қизил шарбат” сериалининг бешинчи мавсумида суратга тушмаслигини мухлислар бир неча ҳафта олдин билишган эди. Бироқ ссенарий муаллифлари унинг қаҳрамони Нилайни сюжетдан қандай чиқариб юбориши ҳамма учун мутлақо кутилмаган воқеа бўлди.
Журналистларнинг маълумотига кўра, Нилай ҳам худди Нурсема ва Илҳами каби ссенарий бўйича вафот этган. Сериалнинг бешинчи мавсуми Кивилджимнинг уйидаги саҳна билан бошланади. Шундан сўнг томошабинлар Улви ва Апони ўз фарзандларининг қабри тепасида кўришади ва айнан ўша ерда Нилайнинг ҳам қабр тоши кўрсатилади. Ҳозирча Мустафонинг рафиқасига айнан нима бўлгани ва унинг ўлимига нима сабаблиги ҳақида ҳеч қандай аниқ маълумот йўқ.