Бурак Ўзчивит янги сериал билан экранларга қайтмоқда: “Қуёш чиқадиган жой” ҳақида нималар маълум?

Бурак Ўзчивит янги сериали — “Қуёш чиқадиган жой” билан экранларга қайтмоқда: тафсилотлар маълум

Машҳур турк актёри Бурак Ўзчивитни тарихий лойиҳалардан ташқари, замонавийроқ асарларда кўришдан умидини узганлар кўп эди. Ахир, у беш йил давомида “Ҳукмдор Усмон” сериалида суратга тушиб, актёрнинг образи шу қадар мустаҳкам ўрнашиб қолганки, уни ҳамма шу рол билан эсларди.

Шунга қарамай, бир йиллик танаффус ва ўзининг “Истанбулнинг энг гўзал қизи” номли моноспектаклидан сўнг, Бурак ўз дидига мос лойиҳани топа олди.

Яқин орада “Қуёш чиқадиган жой” (Гüнеşин Доğдуğу Ер) номли янги сериал томошабинлар эътиборига ҳавола этилади. Қуйида ушбу сериал ҳақида ҳозиргача маълум бўлган барча маълумотларни жамладик.

**“Қуёш чиқадиган жой” сериалининг сюжети**

“Тимс&Б” продюсерлик компанияси томонидан суратга олинадиган янги турк сериали томошабинларни 80-йиллардаги Адана шаҳрига олиб боради. Давр тасодифан эмас, балки атайлаб танланган: айнан ўша пайтлар мамлакатда турли-туман воқеаларга бой бўлган.

Сюжет марказида нуфузли Козанлар оиласининг кўзга кўринган меросхўри Кенан ва унинг онаси Жалодатнинг ҳикояси туради. Ўз вақтида айнан у ўғлини Германияга жўнатган, ўғли эса у ерда Лайло билан танишган. Қиз ўз эркинлигига ўрганиб қолган, илғор қарашларга эга муносабатлар тарафдори ва турли анъаналарга қатъиян қарши чиқади.

Кенан эса бошқача тарбия олган, бироқ Лайлога нисбатан ҳис қилаётган туйғулари олдида ожиз қолади. Ҳикоядаги асосий зиддият бурч ҳисси ва шахсий туйғулар қарама-қаршилигига асосланади ва бу, айниқса, Жалодат Кенанга идеал келин – Хонзодани топганида яққол намоён бўлади.

Шунингдек, икки она – Жалодат ва Давроннинг ўзаро қарама-қаршилиги, қоронғу оилавий сирлар, фитналар ва мерос учун курашлар ҳам ҳикоядан ўрин олган. Интернетдаги тавсифлардан келиб чиқиб шуни айтиш мумкинки, сериал умумбашарий мавзуларга эътибор қаратиб, уларни қаҳрамонларнинг шахсий кечинмалари орқали очиб беради.

**“Қуёш чиқадиган жой” сериали жамоаси**

Юқорида таъкидлаганимдек, турк телевидениеси учун бу янги ҳикояни томошабинларга “Мутлақо бошқа одам”, “Ашраф ва Рўё” ва “Муҳташам юз йил” каби сериалларни тақдим этган Тимс&Б продюсерлик компанияси яратмоқда.

Бу эса лойиҳанинг кенг кўламли бўлишини ва бир неча мавсум давом этишини тахмин қилиш имконини беради. Сериал премьераси АТВ телеканалида бўлиб ўтиши режалаштирилган.

“Қуёш чиқадиган жой” лойиҳасининг режиссёрлари икки нафар: Чағри Вила Лостували (“Крупье”, “Бу шаҳар сенга эргашади”, “Ташландиқ”) ва Чигдем Бозали (“Бегуноҳлар хонадони”). Ҳар иккиси ҳам драма ва мелодрама жанрларида ишлашни афзал кўргани учун сериал консепсиясига жуда мос тушади.

Ссенарийни эса турк сериаллари мухлисларига “1001 кеча” ва “Чилпарчин” сериаллари учун ёзган сюжетлари билан таниш бўлган Йилдиз Тунч қаламга олади. Унинг шиддатли ва кескин оилавий драмаларни яратиш борасида тажрибаси катта, шу боис томошабинларни кафолатланган қизиқарли воқеалар кутмоқда.

Янги сериалнинг суратга олиш ишлари 2026-йил 14-августда Аданада бошланди. Асосий жой сифатида эса “Бир замонлар Чукуровада” сериали мухлисларига таниш бўлган афсонавий қўрғон танланди.

**“Қуёш чиқадиган жой” сериали актёрлари**

“Қуёш чиқадиган жой” сериали билан боғлиқ вазият бошиданоқ анча чигал эди. Дастлаб асосий эркак қаҳрамон — Кенан роли Уғур Гунешга берилган. Актёр суратга олиш ишларини бошлашга тайёр турса-да, сўнгги лаҳзада ҳамма нарса ўзгариб, унинг ролини Бурак Ўзчивитга беришди.

Жамоа гўёки актёр шартномани ўз ихтиёри билан бекор қилгандек кўрсатишга уринди, бироқ Уғур Гунеш ролдан маҳрум қилинганига шаъма қилди. Инсайдерлар Буракнинг ссенарийни ўқиб чиққани, у актёрга маъқул келгани ва шундан сўнг Кенан ролини ўзига беришни сўрагани ҳақида ёзишган. Тимс&Б раҳбарияти бунга рози бўлиб, “Муҳташам юз йил” сериали юлдузига жой бўшатиш учун Уғур Гунеш билан келишувни бекор қилган.

Узоқ вақт давомида актёр учун Лайло ролини ижро этадиган мос шерик топа олишмади. Натижада бош аёл ролини актриса Бейза Гумущине қўлга киритди.

Янги сериалдаги кўзни қувонтирадиган алоҳида жиҳат — актриса Сибел Тащиоғлу (“Қизил шарбат”даги Пембе) Кенаннинг онаси Желадет ролида. Айнан у ўғлига муносиб келин танлайди ва унинг Лайло билан муносабатларига қарши чиқади.

Сериалнинг актёрлар таркибига, шунингдек, Гўркем Севиндик (“Ашраф ва Рўё”), Деврим Якут (“Шокир пошо сулоласи: мўжизалар ва можаролар”), Муҳаррем Турксевен (“Ўмер”), Баҳар Суер (“Агар эркак севса”), Назлижан Демир (“Икки дунё, бир истак”) ва Саҳра Кубра Гумуш (“Номус сўзи”) ҳам кирган.

**“Қуёш чиқадиган жой” сериалининг намойиш санаси**

Ҳозирча лойиҳанинг аниқ намойиш санаси белгиланмаган, бироқ Аданада суратга олиш ишлари авжида эканини ва лойиҳанинг ижтимоий тармоқдаги расмий саҳифасида тизер пайдо бўлиб улгурганини инобатга олсак, инсайдерларнинг дастлабки тахминларига ишониш мумкин.

Уларнинг сўзларига кўра, “Қуёш чиқадиган жой” сериали АТВ телеканалида пайшанба кунлари намойиш этилади, биринчи қисми эса 2026-йилнинг 17- ёки 24-сентябрида эфирга узатилади. Янги сериалга “Ворис: Аждодлар чорлови” ва “Сен мен севган инсон” каби анча “кучли” дизилар рақобатчилик қилади.