Шри-Ланка суди даҳшатли Пасха портлашлари бўйича ҳукм чиқаради

Шри-Ланка суди Пасха байрамидаги қонли портлашлар иши бўйича ҳукм чиқаради

Бир неча йиллардан бери қурбонларнинг оилалари ҳужумлардан кейин жавобгарликни талаб қилиб, мунтазам равишда норозилик намойишлари ўтказиб келмоқда.

Шри-Ланка суди 2019 йилда 270 кишининг ҳаётига зомин бўлган ва 500 дан ортиқ кишини жароҳатлаган Пасха портлашларини ташкиллаштиришда айбланаётган Науфер Моулави устидан ҳукм чиқариши кутилмоқда.

Яна 23 киши мувофиқлаштирилган худкушлик ҳужумларини режалаштириш ва амалга оширишдаги роллари учун ўз тақдирларини билиб олишади.

Бир нечта объектларга, жумладан, Пасха ибодати ўтказилаётган бир нечта черковларга ва учта ҳашаматли меҳмонхонага уюштирилган ҳужумлар Шри-Ланкада 2009 йилда фуқаролар уруши тугаганидан бери содир бўлган энг қонли воқеа бўлди.

Тўққиз нафар худкуш террорчининг шериклари ва қариндошлари қотиллик, терроризм содир этиш учун тил бириктириш ва ўқотар қурол сақлаш каби 23 000 дан ортиқ айбловларга дуч келмоқда.

Прокурорлар Моулавини ҳужумларнинг бош ташкилотчиси деб топдилар ва судга унинг иштирокини тан олган ихтиёрий иқрорномасини тақдим этдилар.

Суд иқрорномани қабул қилди. Аммо кейинроқ Моулави ишни кўриб чиқаётган уч нафар судьядан иборат ҳайъатга нимага имзо чекаётгани унга кўрсатилмаганини айтди ва ўзига қўйилган айбловларни рад этди.

Айблов томонидан 2 300 дан ортиқ киши кўрсатма берди.

Шунингдек, 2 076 та далил, жумладан, портловчи моддалар, қиличлар ва ўқотар қуроллар тақдим этилди.

Ҳужумлардан сўнг Шри-Ланка расмийлари «разведканинг жиддий муваффақиятсизлиги»ни қайд этишди. Парламентда Ҳиндистондан ҳужумлар ҳақида келган огоҳлантириш расмийларга тўғри етказилмагани айтилди.

2023 йилда Олий суд собиқ президент Майтрипала Сирисенага портлашлар қурбонларига миллионлаб товон пули тўлашни буюрди, чунки у ҳужумларга олиб келган миллий хавфсизликдаги камчиликлар учун жавобгар деб топилди.

Ўтган ойда икки собиқ юқори лавозимли мулозим портлашларга олиб келган жиноий эҳтиётсизлик учун ўлим жазосига ҳукм қилинган эди. Шри-Ланкада ўлим жазосини ижро этишга бир неча ўн йиллик мораторий жорий этилгани сабабли, бундай ҳукмлар одатда умрбод қамоқ жазосига алмаштирилади.

Йиллар давомида Шри-Ланка аҳолиси Пасха ҳужумлари қурбонлари учун адолат талаб қилиб, мунтазам равишда намойишлар ўтказиб келмоқда.

Сешанба кунги ҳукм собиқ разведка раҳбари Суреш Саллайга нисбатан алоҳида тергов давом этаётган бир пайтда чиқарилмоқда. Саллай портлашларни исломий экстремистлар билан биргаликда ташкиллаштирганликда айбланмоқда.

Бу даъволар Британиянинг Channel 4 телеканали томонидан 2023 йилда суратга олинган ҳужжатли фильмдаги иддаоларга мос келади. Унда фош қилувчи гувоҳнинг кўрсатмалари жой олган бўлиб, унга кўра, ҳужумлар Шри-Ланка сиёсатида узоқ вақт устунлик қилган Ражапакса оиласининг машҳурлигини ошириш учун атайлаб йўл қўйилган.

Февраль ойида ҳибсга олинган Саллай бу айбловларни рад этмоқда. 2019 йилги ҳужумлардан бир неча ой ўтиб, исломий экстремизмга қарши кураш кампанияси ортидан президент этиб сайланган собиқ президент Готабая Ражапакса ҳам айбловларни инкор этди.

Мамлакатни тарк этиши тақиқланган Ражапакса суддан давом этаётган терговлар доирасида эҳтимолий ҳибсга олинишининг олдини олишни сўраган.