Шифохоналарга 2026-йилда 900 дан ортиқ ҳужум уюштирилди — ЖССТ

**ЖССТ: 2026-йилда шифохоналарга 900 дан ортиқ ҳужум уюштирилди, 911 киши ҳалок бўлди**

Жаҳон соғлиқни сақлаш ташкилоти (ЖССТ) маълумотларига кўра, 2026-йилда тиббиёт муассасалари ва ходимларига нисбатан 914 та ҳужум содир этилган. Бирлашган Миллатлар Ташкилоти томонидан эълон қилинган ушбу маълумотларга кўра, ушбу ҳужумлар натижасида камида 911 киши ҳаётдан кўз юмган ва 1486 киши жароҳатланган. Бу ҳар куни ўртача тўрттадан ортиқ ҳужум содир бўлганини англатади.

Шунингдек, ушбу даврда тиббиёт ходимларини ва беморларни ўғирлаш, ҳибсга олиш ҳамда ушлаб туриш билан боғлиқ 44 та ҳолат қайд этилган. Бу ҳолатларнинг аксарияти тиббиёт ходимларини ушлаб туриш билан боғлиқ бўлиб, ундан 94 киши жабрланган.

ЖССТнинг гуманитар ёрдам ва табиий офатларни бошқариш бўйича директори Алтаф Мусанийнинг таъкидлашича, 2018-йилдан буён тиббиёт муассасаларига қарши 10 400 дан ортиқ ҳужум ҳужжатлаштирилган. Бу ҳужумлар натижасида тахминан 5700 киши ҳалок бўлган ва яна 8500 киши тан жароҳати олган.

2026-йилда тиббиёт соҳасига қилинган ҳужумлардан энг кўп Украина, Ливан ва босиб олинган Фаластин ҳудудлари жабр кўрган. Шунингдек, Мянма, Эрон, Судан, Конго Демократик Республикаси, Жанубий Судан, Россия Федерацияси, Сурия ва Нигерияда ҳам тиббиёт муассасаларига ҳужумлар қайд этилган. ЖССТ Яқин Шарқдаги уруш давомида, жумладан Ливан, Исроил ва Эронда тиббиёт обьектларига қилинган ҳужумларни рўйхатга олишда давом этмоқда.

2026-йилда энг кўп учраган ҳужум тури оғир қуроллардан берилган зарбалар бўлган. ЖССТ касалхонага ҳужум қилинганда фақатгина ичкаридаги одамлар жабр кўрмаслигини таъкидлади. Бу шуни англатадики, ҳужумдан кейинги кунларда беморлар зарур хизматларни ололмайди, тиббиёт ходимлари ишидан айрилади ва ҳаётий муҳим дори-дармонлар таъминоти узилади.

Айбдорларни жавобгарликка тортиш масаласида Мусаний ташкилотда бунинг учун ваколат ҳам, зарур ҳуқуқлар ҳам йўқлигини таъкидлади. Унинг сўзларига кўра, "афсуски, тасдиқланган 10 мингдан ортиқ ҳужумдан бирортаси ҳам ҳали жавобгарликка тортилмаган".

Аввалроқ ЖССТ сўнгги тўрт йилда Европада иссиқдан 200 минг одам вафот этгани ҳақида маълумот берганди. Ташкилотнинг Европа минтақавий бюроси директори Ҳанс Клюгенинг сўзларига кўра, охирги 20 йилда иссиқлик билан боғлиқ ўлим ҳолатлари 30 фоизга ошган.