Шифокорлар адашди: Британияда 7 ёшли болада инсулт юз берганини ЧатГПТ аниқлай олди

Шифокорлар хато қилган: Британияда 7 ёшли болада инсултни ЧатГПТ аниқлаган

Буюк Британияда 7 ёшли болада инсулт юз берганини ЧатГПТ аниқлай олган.

Ҳодиса 2026-йил май ойида содир бўлган. Британиялик аёлнинг 7 ёшли ўғли сузиш пайтида танасининг чап томонида увишиш, “чумоли юргандек” ҳисси ва ҳолсизлик борлигини айтган.

Шундан кейин она ЧатГПТъдан бу белгилар нимадан келиб чиқиши мумкинлигини сўраган. Сунъий интеллект инсулт эҳтимолини кўрсатиб, болани шифокорга олиб боришни тавсия қилган.

Она болани шифохонага олиб борган. Аммо кўрикдан сўнг шифокорлар уни уйига қайтарган.

Кейинги ҳафталарда боланинг аҳволи оғирлашган. 25-июн куни у кўнгли айниб уйғонган, алаҳсирай бошлаган, атрофдагиларга жавоб бермаган ва деярли ҳаракатлана олмаган.

“Болам уйғониб, ўзини ёмон ҳис қилаётганини айтди, кейин бир неча марта қайт қилди. У жуда гангиб қолган эди: куларди, юра олмасди, гавдасини тутиб туролмасди, кўзлари юмилган эди. У гапларимга умуман жавоб бермасди”, дейди боланинг онаси.

Унинг айтишича, бола тинмай сўлак оқизган. Дастлаб она ўғлининг аҳволи ёмонлашишини Буюк Британияда кузатилган кучли иссиқ билан боғлаган. Ўша куни ҳаво ҳарорати 38 даражагача кўтарилган.

“Ҳарорат 38 даража бўлган куни ҳаммаси иссиқ туфайли бўлиши мумкин, деб ўйлагандим”, деди у.

Бироқ боланинг шифохонадаги ҳолати жуда оғирлашган. Онасининг сўзларига кўра, унда тиришишга ўхшаш белгилар кузатилган ва бола оғриқдан қичқирган. Шундан кейингина яқинларининг қатъий талаби билан унга тўлиқ тиббий текширув ўтказилган.

Текширув натижасида мия артерияларидан бири тўсилиб қолгани ва бу ишемик инсултга сабаб бўлгани аниқланган.

Бола зудлик билан ихтисослаштирилган клиникага олиб кетилган ва уч ҳафта давомида сунъий кома ҳолатида сақланган. Шифокорлар унинг соғайиш эҳтимолини жуда паст баҳолаган. Энг яхши ҳолатда бола ўнг қўли билан тугма тақа олиш даражасида тикланиши мумкинлиги айтилган.

Шунга қарамай, 11-август куни бола шифохонадан чиқарилган. Ҳозир у юриш ва гапиришни қайта ўрганмоқда. Бироқ мияга етган зарар унинг ривожланишида жиддий ортга кетишга олиб келган. Айни пайтда онаси унинг реабилитацияси билан шуғулланмоқда.

Шифохоналар бирлашмаси вакили оиладан расман узр сўраган ва шифокорлар инсултни дастлабки босқичда нима сабабдан аниқлай олмаганини ўрганиш учун ички текширув бошланганини билдирган.

Анхой провинсиясида яшовчи 67 ёшли фермер тахминан бир йилдан бери сунъий интеллект (СИ) дан фойдаланиб келади. У экин экиш ва ўғитлаш муддатларидан тортиб пестицидлардан фойдаланишгача бўлган масалаларда СИдан маслаҳат олган.