“Шахматдан завқ олишга ҳаракат қилдим”. Синдаров — тож учун кечадиган ўйин олдидан сўнгги турнир ҳақида
Жавоҳир Синдаров АҚШдаги Слутч Чесс турниридаги ғалабасидан сўнг Доммараджу Гукешга қарши жаҳон чемпиони унвони учун кечадиган учрашувга тайёргарлик ҳақида гапирди. Унинг сўзларига кўра, Сент Луисдаги муваффақият унга ишонч бағишлаган, бироқ бўлажак учрашув мутлақо бошқача ёндашувни талаб этади.
“Шахматдан завқ олишга ҳаракат қилдим”. Синдаров — тож учун кечадиган ўйин олдидан сўнгги турнир ҳақида
Ўзбекистонлик гроссмейстер Жавоҳир Синдаров АҚШнинг Сент Луис шаҳрида 27−29-октабр кунлари ўтказилган Слутч Чесс: Чампионс Шовдовн турниридаги ғалабаси ҳақида фикр билдирди.
Уч кунлик мусобақа якунида 20 ёшли Синдаров 20,5 очко тўплаб, ҳиндистонлик Рамешбабу Прагнанандха (19 очко), америкалик Фабиано Каруана (16,5) ва Хикару Накамурани (12) ортда қолдирди. Ўзбекистонлик шахматчининг мукофот жамғармаси ва бонуслар билан бирга ҳисобланган умумий даромади 168 минг долларни ташкил этди.
Мусобақа тугагач Личессъга берган интервюсида шахматчи бу ғалаба унинг учун алоҳида аҳамиятга эга эканини, чунки турнир жаҳон шахмат тожи учун бўладиган ўйин олдидан охиргиси бўлганини айтди.
“Албатта, мен хурсандман. Жаҳон чемпионлиги учун кечадиган учрашув олдидан ушбу турнир мен учун жуда катта аҳамиятга эга. Мен ушбу ўйин олдидан сўнгги турнирда шахматдан завқ олишга ҳаракат қилдим, чунки олдиндаги учрашув жуда оғир кечишини биламан. Бу ерда вақтимни ажойиб ўтказдим, партиялар ҳам яхши бўлди. Албатта, натижамдан қониқдим, бугунги кун эса шунчаки ажойиб ўтди”, — деди Синдаров.
Личесс бошловчиси амалдаги жаҳон чемпиони Доммараджу Гукеш 2025-йилги Слутч Чесс турнирида қатнашиб, сўнгги ўринни олганини, Синдаров эса 2026-йилда ғолиб чиққанини эслатди.
Бу натижаларни бўлажак жаҳон тожи учун кечадиган ўйиннинг ўзига хос башорати деб талқин қилиш мумкинми, деган саволга ўзбекистонлик гроссмейстер салбий жавоб берди.
“Мен бу ниманидир англатади деб ўйламайман. Мен энг яхши юришларга ишонаман ва бу каби омилларга ишонмайман. Менинг мақсадим — жаҳон чемпионлиги учун кечадиган учрашувда жуда яхши ўйин кўрсатиш, уёғини эса кўрамиз. Мен ҳақиқатан ҳам бундай нарсаларга ишонмайман”, — деди гроссмейстер.
Шу билан бирга, у бундай кучли рақиблар устидан қозонилган ғалаба фаолиятидаги энг муҳим учрашув олдидан ишонч беришини тан олди.
“Албатта, ғалаба қозониш ҳамиша ёқимли. Бу муайян даражада ишонч бағишлайди. Лекин бу учрашув, бутунлай бошқача диққат-эътибор билан ёндашиш керак бўлган мутлақо бошқа мусобақа. Албатта, бундай кучли иштирокчилар таркибига эга оғир турнирда ғолиб чиқиш ёқимли”, — деди Синдаров.
Шахматчи, шунингдек, Сент Луис шахмат клуби ва ташкилотчиларга таклиф ҳамда мусобақани ўтказганлари учун миннатдорлик билдирди.
Турнирнинг сўнгги кунида Синдаров учта ғалабага эришди ва уч бор дуранг ўйнаб, пешқадам Прагнанандхадан 2,5 очколик фарқни йўққа чиқарди.
Айниқса, Хикару Накамурага қарши партия жуда ёрқин кечди, унда ўзбекистонлик шахматчи қора доналарда ўйнаб, эски ҳинд ҳимоясини қўллади. Рақиб шоҳига ҳужум чоғида Синдаров филни қурбон қилди, сўнг икки марта рухни енгил фигурага алмаштирди.
Турнирдаги ғалабадан кейин Саинт Лоуис Чесс Слубъга берган интервюсида у бу партияга юқори баҳо берди.
“Хикару билан ўйнаганимда бу ҳаётимдаги эски ҳинд ҳимоясида ўтказилган энг яхши партиялардан бири бўлди. Ҳатто шундай қисқа вақт назоратида ҳам жуда яхши ўйнадим”, — деди Синдаров.
Осонроқ йўллар билан ғалабага эришиш имконияти бўлса-да, комбинацион ўйинни давом эттириш қарорини изоҳлар экан, гроссмейстер шундай деди:
Унинг айтишича, мусобақанинг сўнгги куни эрталаб Инстаграмъда шарҳловчилар Яссер Сейраван ва Морис Эшли уни ўз фаворитлари деб атаган видеони кўриб қолган.
“Мен: тўхта-чи, балки бугун ҳақиқатан ҳам яхши ўйнашим керакдир, деб ўйлаб қолдим”, — деди шахматчи.
Синдаровнинг таъкидлашича, унинг дастлабки режаси сўнгги кундаги барча мини-учрашувларда ғалаба қозониш бўлган.
Шу билан бирга, у Фабиано Каруанага қарши партияларнинг бирида устунликни ғалабага айлантира олмаганидан сўнг, бир вақтнинг ўзида Прагнанандханинг муваффақиятли ўйинини кузатиб, бироз хавотирга тушганини тан олди.
Личессъга берган интервюсида гроссмейстер Каруанага қарши ўтказилган дуранг партияни алоҳида қайд этди.
“Менга Фабига қарши қора доналарда ўйналган ва дуранг билан якунланган партия жуда ёқди. Жуда яхши босим ўтказдим, лекин вақт етмай қолди. Бу партия ҳақиқатан ҳам фантастик бўлди”, — деди у.
Синдаров, шунингдек, ўз шоҳининг хавфли ҳолатида кечган мураккаб позицияда Прагнанандха устидан қозонилган ғалабани ҳам муҳим деб атади.
Интервю давомида шахматчидан Личесс платформасидаги фаоллиги, хусусан, жуда қисқа вақт назоратига эга, яъни ҳар бир партияга бир дақиқадан бериладиган буллет шахмат ўйнаши ҳақида ҳам сўрашди.
Синдаровнинг сўзларига кўра, баъзан у бундай партиялардан стрессни чиқариш учун фойдаланади.
“Баъзан енгил стресс ҳис қилганимда, видеоўйинлар ўйнаш ўрнига буллет ўйнашга ҳаракат қиламан. Албатта, менга Личессъда ўйнаш ёқади. Мақсадим рейтингни доимо 3300 даражасида ушлаб туриш ва мен бу учун курашаман”, — деди гроссмейстер.
У “1+0” вақт назоратидаги партиялар кичик тактик имкониятларни тезроқ пайқашга ёрдам беради, деб ҳисоблайди.
Бироқ Синдаров нисбатан пастроқ даражадаги шахматчиларга бундай форматни тавсия этмайди.
“Оддий даражада бундай форматда ўйнашни тавсия қилмаган бўлардим. Ғоят кучли шахматчига айланганингда, бу кичик тактик имкониятларни жуда тез пайқашга ёрдам бериши мумкин”, — дея тушунтирди у.
Жавоҳир Синдаров ва амалдаги чемпион Доммараджу Гукеш ўртасидаги жаҳон чемпиони унвони учун кечадиган учрашув 2026-йилнинг 22-ноябридан 12-декабрига қадар Женевада (Швейсария) бўлиб ўтади. Биринчи партия 24-ноябрга белгиланган.
Қарама-қаршилик классик вақт назорати остидаги максимал 14 та партиядан иборат бўлади. Муддатидан олдин ғалаба қозониш учун иштирокчилардан бири 7,5 очко жамғариши керак. Агар 14 та партиядан сўнг ҳисоб тенг бўлиб қолса, 12-декабр куни тай-брейк ўтказилади.
Учрашувнинг мукофот жамғармаси камида 2,5 млн долларни ташкил этади.
Синдаров 2026-йили Кипрда бўлиб ўтган Даъвогарлар турнирида 14 имкониятдан 10 очко жамғариб, мусобақа якунланишига бир тур қолганда биринчи ўринни таъминлади ва амалдаги жаҳон чемпиони билан ўйнаш ҳуқуқини қўлга киритди.
Гукеш жаҳон тожини 2024-йилнинг декабрида хитойлик гроссмейстер Дин Лиженни мағлуб этиб қўлга киритган эди.
Бўлажак учрашувнинг иккала иштирокчиси ҳам 20 ёшда. Халқаро шахмат федерацияси (ФИДЕ) маълумотига кўра, бу шахмат тарихидаги иштирокчилар ёши бўйича энг ёш жаҳон чемпионлиги учрашуви бўлади.