Шавкат Мирзиёев «Хитой мўъжизаси»ни жамият жипслигига мисол қилиб келтирди
Йирик ислоҳотларни бирлик, ҳамжиҳатлик ва тинчликсиз амалга ошириб бўлмайди, деди Ўзбекистон президенти. У Хитойни мисол қилиб келтирди, у ерда, унинг сўзларига кўра, «ҳамма бир томонга қаради ва биргаликда бу мўъжизани яратди». Тошкент, дея таъкидлади Шавкат Мирзиёев, бутун мамлакат учун намуна бўлиши керак.
Шавкат Мирзиёев «хитой мўъжизаси»ни жамият бирдамлигининг намунаси деб атади
Ўзбекистон Президенти Шавкат Мирзиёев 11 сентябрь куни Тошкент фаоллари билан учрашувда кучайиб бораётган глобал хавф-хатарлар фонида мамлакатда бирдамликни сақлаш, тинчликни асраш ва ислоҳотларни жадаллаштириш зарурлигини таъкидлади.
«Дунёда тўполонлар бўляпти, ташвишли воқеалар кўп, хавф-хатарлар ортиб боряпти. Бу таҳдидларга қарши туриш учун биз кимлигимизни билишимиз керак. Ҳозир тез-тез: кеча ким эдигу бугун ким бўлдик, деган ибора янграмоқда. Буни унутмаслик, эришилган ютуқларни қадрлаш керак», — деди Шавкат Мирзиёев.
Унинг сўзларига кўра, эришилган ўзгаришларнинг қадри, айниқса, меҳнат ва одамларнинг ислоҳотлар натижаларидан розилиги орқали яққол сезилади.
«Биз буни қачон қадрлаймиз? Қачонки меҳнат қилсак, халқ рози бўлса. Бугун Олмазор туманини айланиб, бу ерда амалга оширилган ўзгаришларни кўриб, тушунасан киши: агар ҳаракат қилинса, ҳамма нарсани қилса бўлар экан», — деди давлат раҳбари.
У, шунингдек, ички ислоҳотларни мамлакат ташқи сиёсати билан боғлади.
«Ўзингиз кўриб турибсиз, ташқи сиёсатда ҳам асосий мақсадимиз — дўстлар орттириш, ислоҳотларимиз учун шериклар излаш. Шериклик эса биз ишонтира олишимиз, ишончга лойиқ бўлишимиз ва фақат натижа учун ишлашимиз кераклигини англатади — ҳаётнинг ўзи бизни шунга мажбур қилмоқда», — деди Мирзиёев.
Президент сўнгги уч-тўрт йилда 2500 га яқин ёшлар турли йўналишлар бўйича хорижга ўқишга юборилганини маълум қилди.
У, шунингдек, Малайзияда ўқиш учун йирик грант ютиб олган, бироқ Ўзбекистонда қолишга қарор қилган талаба қиз билан бўлган суҳбати ҳақида гапириб берди.
«Мен топ-20 таликка кирдим, Малайзияда энг катта стипендияни қўлга киритдим. Аммо бу ерда биз учун яратаётган имкониятларингизни билиб, Ўзбекистонда ўқишга қарор қилдим. Ота-онам ҳам бу қароримни қўллаб-қувватлашди», — дея қизнинг сўзларини келтирди президент.
Шавкат Мирзиёев буни мамлакат ичидаги имкониятларнинг кенгайиши, жумладан, Президент ва ихтисослаштирилган мактаблар ҳамда янги университетлар ташкил этилгани билан боғлади.
«Агар ўз вақтида Президент ва ихтисослаштирилган мактабларни очмаганимизда, бугун шундай натижалар бўлармиди?» — дея сўради у.
Президентнинг сўзларига кўра, ислоҳотлар бошланганда олий таълим билан қамраб олиш даражаси 9 фоизни ташкил этган бўлса, ҳозир бу кўрсаткич 44 фоизга етди. Олий ўқув юртлари сони 207 тага етди.
«Ҳозирги мураккаб шароитда 44 фоизлик қамров ва 207 та олий ўқув юрти ўз-ўзидан пайдо бўлиб қолгани йўқ. Бунинг замирида бир нарса турибди — биз тўғри йўлни танладик», — деди Шавкат Мирзиёев.
Президент таълимни мамлакатни янада ривожлантиришнинг асосий шарти деб ҳисоблашини таъкидлади.
«Бир нарсани такрорлашдан чарчамайман: тақдиримизни фақат ўқитувчи, таълим ва билим ҳал қилади. Барча соҳаларда. Агар таълимни йўлга қўймасак, ҳеч нарсага эриша олмаймиз», — деди у.
Унинг сўзларига кўра, ислоҳотлар суръати доимий равишда ошиб бориши керак.
«Ҳар бир кун ғанимат. Бугун кечагидан кўпроқ меҳнат қилишимиз керак. Кечаги режалар бугунги кунга тўғри келмайди. Бундай ислоҳотларни амалга ошириш учун бизга нима керак? Бирдамлик, аҳиллик ва тинчлик. Биз бу тинчликни қадрлашимиз керак», — деди Мирзиёев.
Якунда Шавкат Мирзиёев Тошкент бутун мамлакат учун намуна бўлиши кераклигини таъкидлаб, Хитойни мисол қилиб келтирди.
«Биласизми, нима учун хитой мўъжизаси пайдо бўлди? Аҳолиси — 1,4 миллиард киши. Лекин бутун мамлакат бирлашди: нуронийлар ҳам, оқсоқоллар ҳам, ёшлар ҳам, аёллар ҳам — ҳамма бир томонга қаради ва биргаликда ушбу мўъжизани яратди».
Йиғилишда президент Тошкент шаҳрининг 12 та тумани ҳокимлари 1 октябрга қадар йирик савдо мажмуалари ва молллар учун майдонлар, инвесторлар ва молиялаштириш манбаларини белгилаши кераклигини айтди. Шу билан бирга, расмийлар «Кичкирик» намунаси асосида 400 та маҳаллани ободонлаштиришни ва бунга 10 триллион сўм йўналтиришни режалаштирмоқда.
Республика ва шаҳар мутасаддилари ҳар ҳафта Тошкент туманларига бориб, инвесторлар билан учрашади. Юқори даражада ҳал этилиши лозим бўлган масалалар ўша куннинг ўзида Президент Администрациясига юборилади. Янги тартиб йил якунига қадар алоҳида назорат остида амал қилади.