Шавкат Мирзиёев Ўзбекистонда иккинчи ва учинчи АЭС қуриш режалари ҳақида маълум қилди

Шавкат Мирзиёев Ўзбекистонда иккинчи ва учинчи АЭС қуриш режалари ҳақида баён қилди

Ўзбекистон Президенти Шавкат Мирзиёев мамлакатда иккинчи ва учинчи атом электр станцияларини қуриш ниятида эканини маълум қилди. Бу ҳақда у 16 октябрь куни инвесторлар билан учрашувда атом энергетикасини ривожлантириш истиқболлари ҳақида сўз юритар экан, айтиб ўтди.

Давлат раҳбари Ўзбекистон атом энергетикасига, жумладан, уран қазиб олишнинг ортиб бориши ва бу соҳада тўпланган тажрибани ҳисобга олган ҳолда, катта аҳамият бераётганини таъкидлади.

«Эртага биз янги ҳамкорлар, инвесторлар билан иккинчи атом электр станциясини қуриш бўйича музокаралар ўтказамиз. Шунинг учун биз атом энергетикасига жуда катта эътибор қаратмоқдамиз. Бизда уран қазиб олиш сезиларли даражада ошмоқда. Биз уран қазиб олишга йирик инвестициялар киритдик, имкониятлар ва тажриба тўпладик. Шу сабабли биринчи АЭС қурилишини бошладик. Иккинчиси бўйича ҳам, учинчиси бўйича ҳам режаларимиз бор», — деди Шавкат Мирзиёев.

Президент янги атом электр станциялари айнан қаерда жойлашиши мумкинлиги, уларнинг қуввати қандай бўлиши, қайси муддатларда қуриш режалаштирилаётгани ва лойиҳалар қанчага тушишига аниқлик киритмади. шунингдек, 17 октябрь куни айнан қайси инвесторлар билан музокаралар ўтказилиши ҳозирча очиқланмаяпти.

Эслатиб ўтамиз, Ўзбекистоннинг биринчи атом электр станцияси Жиззах вилоятининг Фориш туманида Россиянинг «Росатом» давлат корпорацияси билан ҳамкорликда қурилмоқда.

2026 йил март ойида томонлар катта ва кичик қувватли энергоблогларни бирлаштирувчи станциянинг интеграциялашган конфигурациясини назарда тутувчи қўшимча битимни имзоладилар.

Лойиҳада ҳар бирининг қуввати 1000 МВт бўлган ВВЭР-1000 реакторларига эга иккита катта энергоблок, шунингдек, ҳар бирининг қуввати 55 МВт бўлган РИТМ-200Н реакторларига эга иккита кичик энергоблок кўзда тутилган. Станциянинг умумий ўрнатилган қуввати 2110 МВт ни ташкил этади. Толиқ қувватга чиқганидан сўнг, у йилига тахминан 17,2 миллиард кВт·соат электр энергияси ишлаб чиқариши кутилмоқда.

Жорий йилнинг 4 июнь куни Ўзбекистон ва Россия президентлари АЭСнинг биринчи энергоблоки қурилишига старт бердилар. РФ АЭС қурилиши учун имтиёзли экспорт кредити ажратиши кутилмоқда.

2 сентябрь куни президентга тақдим этилган маълумотларга кўра, интеграциялашган лойиҳанинг қиймати 9,5 миллиард долларга баҳоланмоқда.

Биринчи кичик реакторни техник ишга тушириш 2029 йилга мўлжалланган, биринчи катта энергоблокни 2033 йилда ишга тушириш режалаштирилган. Лойиҳани тўлиқ якунлаш 2034−2035 йилларда кутилмоқда.

Шавкат Мирзиёев иккинчи атом электр станцияси лойиҳасини тайёрлаш ҳақида илк бор 17 август куни Хоразм вилоятига ташрифи чоғида ошкора маълум қилган эди.

8 сентябрь куни Белградда бўлиб ўтган ўзбек-серб бизнес-форумида Сербия Президенти Александр Вучич Шавкат Мирзиёев билан суҳбати ҳақида сўзлаб берди. Вучичнинг сўзларига кўра, Ўзбекистон Президенти унга битта атом электр станциясини Россия билан, иккинчисини эса Хитой билан ҳамкорликда қуриш режалари ҳақида маълум қилган.

Сербия етакчиси, шунингдек, Мирзиёевнинг Ўзбекистон биринчи икки лойиҳа якунланишини кутмасдан, атом станциялари қурилишини давом эттириш ниятида экани ҳақидаги сўзларини етказди.

Шу билан бирга, Ўзбекистон расмийлари иккинчи АЭСни қуриш учун Хитой компанияси танланганини расман эълон қилгани йўқ. Лойиҳанинг жойлашуви, қуввати, қиймати ва амалга ошириш муддатлари ҳам очиқланмаган.