Шакира ноябрда Бишкекда консерт бериши мумкин
Шакира ноябрда Бишкекда консерт бериши мумкин
Колумбиялик хонанда Шакира ноябр ойида Бишкекда консерт бериши мумкин. Қирғизистон вакиллари ва қўшиқчининг жамоаси юлдуз ташрифининг шартлари бўйича музокаралар олиб бормоқда. Шоунинг аниқ санаси ҳозирча белгиланмаган, деб хабар беради 24.kg.
Хонандани кутиб олиш режалари ҳақида республика президенти иш бошқарувчиси Қанибек Туманбоев маълум қилди. У ўз саҳифасида қўшиқчи иштирокидаги видеони жойлаштириб, “Шакира! Тез кунда Бишкек Аренада! Кутяпсизми?”, деб ёзган.
Консерт учун 51 минг томошабинни сиғдира оладиган янги “Бишкек Арена” стадиони танланган. Обьект 31-август куни очилган ва у ВИ Бутунжаҳон кўчманчилар ўйинларининг тантанали очилиш маросимига мезбонлик қилган.
Ташкилотчилар ҳозирча чипталар нархи ва сотувлар бошланиш санасини ошкор қилмаяпти. Шакиранинг расмий сайти афишасида ҳам Бишкекдаги консерт қайд этилмаган.