Севги излаб 100 минг доллардан айрилди: танишув иловаларида янги фирибгарлик
Танишув иловаси орқали бошланган муносабатда эркак аёлни қарийб 100 минг долларга туширди. Текширувлар фирибгарликка алоқадор миллионлаб аккаунтлар танишув иловаларида фойдаланувчилар билан алоқа ўрнатганини кўрсатди. Энди компаниялардан одамларни онлайн фирибгарлардан ҳимоя қилиш чораларини кучайтириш талаб қилинмоқда.
Севги излаб 100 минг доллардан айрилди: танишув иловаларидаги янги фирибгарлик
2026-йил октабрида эълон қилинган АҚШ Конгресси ҳисоботида танишув иловаларидаги фирибгарлик ҳолатлари кўриб чиқилган.
Конгресс Матч Гроуп ва бошқа компанияларни танишув иловаларидаги фирибгарлик қурбонларига кўпроқ ёрдам беришга чақирди. Қурбонлардан бири Мери 2024-йилда танишув иловасида бир эркак билан танишади. У янги муносабатлар қуришни истаган эди. Аммо бу танишув уни қарийб 100 минг доллардан айирган романтик фирибгарлик билан якунланди.
Фамилияси ошкор этилмаслигини сўраган Мерининг айтишича, аввалига улар кўп суҳбатлашган. Кейин эркак уни тинмай безовта қилиш, босим ўтказиш ва қайта-қайта пул сўрашни бошлаган. Воқеалар жуда тез ривожланган. Иловаларда унга ўхшаб алданган бошқа жабрланувчилар ҳам бор.
Романтик фирибгарлик — жиноятчилар жабрланувчилар билан муносабат ўрнатиб, улардан пул ёки совғалар олишга уринадиган фирибгарлик туридир. Сенаторлар бундай жиноятлар АҚШда молиявий фирибгарликнинг кенг тарқалган шаклларидан бирига айланганини ва америкаликларга йилига камида 1,3 миллиард доллар зарар етказаётганини билдирган.
2026-йил 14-октабр куни эълон қилинган ҳисоботда Матч Гроуп тақдим этган ички ҳужжатлар ва маълумотлар таҳлил қилинган. 2025-йилнинг иккинчи ярмига келиб, танишув иловалари фирибгарлар ва бошқа қоидабузарларни аниқлашда фойдаланадиган машинали ўрганиш моделларининг аксариятини бир неча йил давомида янгиламаган. Натижада платформа шубҳали аккаунтларни аввалгидек ишончли аниқлай олмаган.
Матч Гроуп тақдим этган маълумотлар яна бир ҳолатни кўрсатган: 2025-йилнинг учинчи чорагигача АҚШда Тиндер ва Ҳинге платформаларидаги фирибгарлар ёки бошқа қоидабузарларга тегишли қарийб 1,5 миллион аккаунт камида битта фойдаланувчи билан топишган, яъни муносабат ўрнатган. Ушбу аккаунтларнинг қарийб 500 мингтаси бошқа фойдаланувчи билан алоқа маълумотларини ҳам алмашган.
Мери фирибгар билан мулоқот қилган пайтида унинг ҳақиқий шахс эканини аниқлашга уринган. Унинг айтишича, эркак доимий равишда алоқага чиққан ва Мерининг қаерда яшашини ҳам билган. Эркак пул иши билан боғлиқ харажатлар ва шошилинч тиббий эҳтиёжлар учун кераклигини айтган.