Севара Назархон ва дирижёр Камолиддин Ўринбоев Қозоғистоннинг давлат мукофотларини олишди

Ўзбек хонандаси Севара Назархон ва дирижёр Камолиддин Ўринбоев Қозоғистоннинг II даражали «Достык» («Дўстлик») ордени билан тақдирландилар. Мукофотлар Ўзбекистон ва Қозоғистон ўртасидаги маданий алоқаларни мустаҳкамлашга қўшган ҳиссаси учун топширилди.

Маросим 29 октябрь куни Астанада бўлиб ўтди. Маданият арбобларига давлат мукофотларини Қозоғистон вице-президенти Ерлан Карин топширди.

Севара Назархон миллий мусиқани оммалаштиргани ва икки мамлакат маданиятларини яқинлаштиришга қўшган ҳиссаси учун эътироф этилди. Ижоди нафақат Ўзбекистонда, балки ундан ташқарида ҳам машҳур.

Камолиддин Ўринбоев орденни мусиқа санъатини ривожлантириш, халқаро маданий ҳамкорлик ва икки мамлакат ўртасидаги ижодий алоқаларни мустаҳкамлашдаги хизматлари учун олди.

Ушбу мукофотлар ўзбек артистларининг мамлакатлар ўртасидаги муносабатларни ривожлантиришга қўшган ҳиссасининг эътирофи бўлди, чунки қўшма концертлар, ижодий лойиҳалар ва маданий алмашинув ҳамкорликнинг муҳим йўналишларидан бири бўлиб қолмоқда.

Аввалроқ II даражали «Достык» ордени афсонавий «Ялла» ансамбли раҳбари, Ўзбекистон халқ артисти Фарруҳ Зокировга топширилган эди.