Серияли қотил Тед Банди 52 йилдан сўнг ўсмир қизнинг қотили эканлиги аниқланди
Юта штати ҳукумати донг таратган қотил қатл этилганидан ўнлаб йиллар ўтиб, эски очилмаган жиноятни фош этиш учун илғор ДНК технологиясидан фойдаланди.
Серияли қотил Тед Банди 52 йилдан сўнг ўсмир қизнинг қотили экани аниқланди
Юта штати ҳукумати илғор ДНК технологиясидан фойдаланиб, донг таратган серияли қотил Тед Бандини 52 йил аввал овчилар томонидан жасади топилган 17 ёшли қизнинг ўлимига алоқадорлигини исботлади.
Маҳаллий полиция бошлиғининг қизи Мелисса Энн Смит 1974 йил 27 октябрда зўрлаш ва қийноқ белгилари билан топилган эди.
Апрель ойида Юта расмийлари яна бир ўсмир — Лора Энн Эймни Бандининг навбатдаги қурбони сифатида аниқлаган эди. Ушбу ишдаги далиллар кейинчалик Смитнинг ишини ҳал қилишга ёрдам берди.
1989 йилда қатл этилишидан олдин Банди Юта штатида яна икки ўсмир қизни ўлдирганини тан олган эди. У АҚШ бўйлаб камида 30 та қотилликка алоқадор деб топилган.
Сешанба куни ўтказилган матбуот анжуманида Юта округи сержанти Майк Рейнольдс штатда Банди билан боғлиқ бошқа ишлар ҳали ҳам кўриб чиқилаётганини айтди. "Ҳар бир ишнинг ёпилиши билан Тед Банди ҳақидаги хотирани ўчириб ташлайлик", деди у.
Солт-Лейк округи шерифи Рози Ривера бу иш бошқа очилмаган жиноятлар қурбонларига "умид борлигини" кўрсатиши кераклигини айтди.
"Ҳар куни криминалистика ўзгармоқда ва бизда ушбу ишларни қайта-қайта кўриб чиқиш имконияти мавжуд", деди у.
У шунингдек, детективларни ушбу ишдаги далилларни шунча вақт давомида сақлаб келишгани учун олқишлаб, бу "ҳатто ўн йилликлар ўтса ҳам далилларни сақлаш зарурлигини кўрсатишини" айтди.
Апрель ойида Юта штати Суд-тиббий экспертиза бюроси директори Salt Lake Tribune нашрига штатда 444 та очилмаган ўлим ҳолати бўйича тергов ҳали ҳам давом этаётганини, жумладан 258 таси қотиллик эканини айтган эди.
Банди Америкадаги энг машҳур серияли қотиллардан бири бўлиб, у ўз қотилликларини АҚШнинг Тинч океани шимоли-ғарбий қисмидаги қурбонларга ҳужум қилишдан бошлаган.
У жамоат жойларида аёлларга яқинлашиб, жозибаси ёки сохта жароҳати билан уларнинг ишончини қозониши, сўнг уларни хилват жойларга олиб бориб ўлдириши билан танилган эди.
У илк бор 1975 йилда аёлни ўғирлагани учун ҳибсга олинган ва 15 йилга озодликдан маҳрум этилган. Аммо 1977 йилда у қамоқхона кутубхонаси деразасидан сакраб қочиб кетган.
У саккиз кундан сўнг қайта ушланган ва яна қочиб кетган, 1978 йилда узил-кесил ушлангунига қадар одам ўлдиришда давом этган.