Саудия Арабистони Маккага учирилган дронни уриб туширди
Саудия Арабистони Маккага йўналтирилган дронни уриб туширди
Саудия Арабистони Макка шаҳри томон учирилган ҳусийлар дронини йўқ қилди.
Дрон муқаддас шаҳар устидаги тақиқланган ҳаво ҳудудига киришидан олдин уриб туширилган. Турки ал-Малкининг сўзларига кўра, бу ҳусийларнинг 2017-йил июлида баллистик ракета учирганидан кейин Маккани нишонга олишга қилган иккинчи уриниши эди.
Ҳарбий коалиция вакили шаҳарнинг хавфсизлиги “қизил чизиқ” эканини таъкидлади.
Саудия Арабистони 15-сентябр куни Макка бўйича хавфсизлик огоҳлантириши берган. Ҳусийларнинг сиёсий бюроси аъзоси Муҳаммад ал-Фараҳ шаҳар нишонга олинганини инкор этди. Ҳусийлар назоратидаги САБА ахборот агентлигида чоп этилган баёнотда бу айблов “мутлақо ёлғон” деб баҳоланди.
Ҳусийлар сўнгги ҳафта ичида Саудия Арабистонига бир нечта йирик ҳужумлар уюштирганини билдирган. Уларнинг айтишича, бу зарбалар Яманга қилинган ҳаво ҳужумларига жавобан амалга оширилган. 14-сентябр куни Саудия Арабистонидаги ҳаво базаси нишонга олинган. Саудия бощилигидаги ҳарбий коалиция вакилларига кўра, ушбу ҳужумда 13 нафар тинч аҳоли вакили жароҳат олган.
Саудия Арабистонига қилинган ҳужумлар олти ойлик АҚШ–Эрон уруши сабаб беқарорлашган глобал энергетика бозорларига таъсир кўрсатди. Аввал Ҳормуз бўғози орқали юк ташиш сезиларли даражада камайган. Тинч даврда бу бўғоздан ҳар куни дунё нефтининг қарийб 20 фоизи ўтказилган.
Ҳормуздаги вазият туфайли Саудия Арабистони нефт экспорти учун муқобил денгиз йўли сифатида Боб ал-Мандаб бўғозидан фойдаланмоқда. Бироқ Яман ҳусийлари сўнгги кунларда Қизил денгиз соҳилининг айрим қисмларини, жумладан дунёдаги энг муҳим кема қатнов йўлларидан бири бўлган Боб ал-Мандаб бўғозига қараган ҳудудларни ўз назоратига олган. Бу Саудия Арабистонининг нефт экспортига хавф туғдирмоқда.
10-сентябр куни Шарқ-Ғарб нефт қувурига ҳужум қилинган. Эртаси куни Саудия Арабистони эҳтиёт чораси сифатида қувур фаолиятини вақтинча тўхтатган. Обьектга ҳужум қилган дронлар Ироқдан учирилгани аниқланган. Ҳолат юзасидан Бағдод текширув бошлаган ва Эрон билан чегарадаги учта ўтиш пунктини ёпган.
Саудия Арабистонининг Форс кўрфазидаги нефт конларини Қизил денгиз билан боғлайдиган 1 200 километр узунликдаги Шарқ-Ғарб қувури қиролликнинг асосий экспорт йўналиши бўлиб келган. Ҳормуз бўғози орқали нефт ташиш эса қарийб етти ой давом этган уруш сабаб издан чиққан.