Саратонни эрта аниқлашда янги усулларни излаётган ўзбек шифокори
Шаҳноза Ҳамидова ёшлигидан тиббиёт ва инсон саломатлигига қизиққан. Бу қизиқиш уни 2016 йилда Тошкент педиатрия
**Саратонни эрта аниқлашда янги усулларни излаётган ўзбек шифокори**
Оғир касалликларни даволашда вақт ҳал қилувчи омил ҳисобланади. Айниқса, саратон каби хасталикларда уни қанчалик эрта аниқлаш мумкин бўлса, бемор учун имкониятлар шунчалик кенгаяди. Шаҳноза Ҳамидованинг тиббиётда танлаган йўли ҳам айнан шу масала — касалликларни эрта ва аниқ ташхислаш билан боғлиқ.
Шаҳноза Ҳамидова ёшлигидан тиббиёт ва инсон саломатлигига қизиқиб келган. Ана шу қизиқиш уни 2016 йилда Тошкент педиатрия тиббиёт институтига олиб келди. Олти йиллик таълимдан кейин, 2022 йилда у «Даволаш иши» йўналишини тамомлаб, умумий амалиёт шифокори малакасини олди.
Талабалик даврида унинг қизиқиши фақат клиник тиббиёт билан чекланиб қолмади. Лаборатория диагностикаси, касалликларни эрта аниқлаш ва замонавий ташхис усуллари уни тобора кўпроқ ўзига жалб қила бошлади.
Бу қизиқиш кейинчалик амалий тажриба билан янада мустаҳкамланди.
Шаҳноза гинекология, жарроҳлик, ЛОР ва бошқа клиник йўналишларда шифокорлар билан бирга ишлаб, беморлар билан мулоқот қилиш, тиббий ҳужжатларни юритиш ва клиник жараёнларда иштирок этиш бўйича тажриба тўплади.
Бироқ унинг кейинги илмий йўналишини белгилаб берган муҳим босқичлардан бири лабораториядаги фаолияти бўлди.
2020–2022 йилларда у Korea No.1 / HANA ITC лабораториясида ишлади. COVID-19 пандемияси даврида PCR диагностикаси, биологик намуналар билан ишлаш, натижаларни қайта ишлаш ва лаборатория маълумотларини юритиш жараёнларида қатнашди.
Пандемия бутун дунё тиббиёти учун оғир синов бўлган бир пайтда, Шаҳноза учун бу давр лаборатория тиббиёти ва молекуляр диагностикага қизиқишни янада кучайтирган босқичга айланди.
Кейинчалик у билим ва тажрибасини ривожлантириш мақсадида АҚШга йўл олди. Ҳозир Нью-Йоркда яшаб, инглиз тилини такомиллаштириш билан бирга илмий тадқиқотлар устида ишламоқда.
Унинг асосий илмий қизиқишлари лаборатория тиббиёти, молекуляр диагностика, саратон биомаркерлари ва саратонни эрта аниқлаш билан боғлиқ. Айни пайтда у мустақил тадқиқотчи сифатида қон асосидаги биомаркерлар, циркуляциядаги ҳужайрасиз ДНК — cfDNA ва диагностик аниқлик масалаларини ўрганмоқда.
Шаҳноза тайёрлаётган илмий ишлар орасида қон асосидаги колоректал саратон скрининги бўйича систематик таҳлил ва мета-таҳлил, шунингдек, ошқозон ости бези саратонини эрта аниқлаш учун қондаги cfDNA метилланиш белгиларининг диагностик имкониятларини ўрганишга қаратилган систематик таҳлил ва мета-таҳлил лойиҳалари ҳам бор. Ҳозирча бу тадқиқотлар тайёрланиш босқичида.
Унинг бу йўналишни танлаши ортида оддий, аммо муҳим мақсад бор — инсонларга ёрдам бериш.
Айниқса, замонавий тиббий хизмат ва ташхис имкониятлари чекланган ҳудудларда яшовчи инсонларнинг тақдири уни ўйлантиради. Чунки кўплаб оғир касалликларда, жумладан саратонда ҳам эрта ташхис инсон ҳаёти учун ҳал қилувчи аҳамият касб этиши мумкин.
Шу боис Шаҳноза ўзининг тиббий билими, лаборатория тажрибаси ва илмий изланишларини бир йўналишда бирлаштиришга ҳаракат қилмоқда: касалликларни имкони борича эрта ва аниқ аниқлаш усулларини ўрганиш.
Унинг келажакдаги режаси ҳам шу йўлни давом эттириш — лаборатория тиббиёти, молекуляр диагностика ва саратонни эрта аниқлаш бўйича илмий тадқиқотлар олиб бориш.
Шаҳноза учун тиббиёт фақат касб эмас. У бу соҳани инсон ҳаётига фойда келтириш, илмий билимни амалий натижага айлантириш ва замонавий диагностика имкониятларини кўпроқ одамларга етказиш воситаси сифатида кўради.