Самарқандда Ўзбекистон сенаторлари делегациялар билан учрашувлар ўтказди
Сенат матбуот хизмати ёш парламент аъзолари конференцияси доирасида Сенат аъзолари Буюк Британия, Ирландия ва Россия делегациялари билан учрашганини маълум қилди.
Самарқандда Ўзбекистон сенаторлари делегациялар билан учрашувлар ўтказди
Самарқандда бўлиб ўтаётган Парламентлараро иттифоқнинг Ёш парламент аъзоларининг XII глобал конференцияси доирасида Ўзбекистон Сенати аъзолари Буюк Британия, Ирландия ва Россия парламент делегациялари билан учрашдилар.
Британия делегациясига парламент Жамоатчилик палатасининг Халқаро ривожланиш қўмитаси аъзоси А. Кернс ва Ташқи ишлар қўмитаси аъзоси Д. Карден вакиллик қилди. Улар билан бўлиб ўтган учрашувда кўп қиррали муносабатларни янада ривожлантириш ва парламентлараро ҳамкорликни мустаҳкамлаш масалалари кўриб чиқилди.
Ирландиянинг Тадбиркорлик, туризм ва бандлик масалалари бўйича парламент қўмитаси раиси Жеймс О'Коннор бошчилигидаги делегация билан учрашувда парламентлараро ҳамкорликни фаоллаштириш, IT-технологиялар ва қишлоқ хўжалигининг янги технологияларини жалб қилиш, шунингдек, таълим соҳасидаги ҳамкорлик масалалари муҳокама қилинди.
Томонлар, шунингдек, халқаро парламент ташкилотлари доирасидаги ҳамкорликни кенгайтириш ва Европа Иттифоқи билан шериклик контекстида қўшма лойиҳаларни амалга оширишни кўриб чиқдилар.
Россия Федерацияси Федерал Мажлиси Федерация Кенгашининг Иқтисодий сиёсат бўйича қўмитаси раиси ўринбосари А. Трембицкий билан учрашувда Ўзбекистон ва Россия ўртасидаги парламентлараро муносабатларни янада фаоллаштириш масалалари кўриб чиқилди.
Икки давлат раҳбарларининг сиёсий иродаси ва ишончли муносабатлари туфайли мамлакатлар ўртасидаги ҳамкорлик ҳар томонлама стратегик шериклик даражасида ривожланаётгани таъкидланди.