Самарқандда энагада қолдирилган бола электр плитага ўтқазилгани айтилмоқда
Каттақўрғон туманида энага қарамоғида қолдирилган 3 ёшли бола оғир аҳволда шифохонага ётқизилди. Гувоҳлар энага болани электр плитага ўтқазгани, қўлларини сим билан боғлаб қийнаганини айтмоқда.
Самарқандда энага қарамоғида бўлган 3 ёшли бола электр плитага ўтқазилгани иддао қилинмоқда. Ҳозирда бола оғир аҳволда жонлантириш бўлимида даволанмоқда.
Маълумотларга кўра, Нарпай туманидан бўлган оиланинг онаси тахминан икки ой давомида фарзандини Каттақўрғон туманидаги энагага қолдириб, ўзи кафеда идиш ювувчи бўлиб ишлаган. Боланинг отаси хорижда меҳнат қилади, онаси эса оилавий келишмовчиликлар туфайли Нарпайдаги уйидан кетган.
Kun.uz нашрига тақдим этилган видеоларда боланинг танасида куйишга ўхшаш оғир жароҳатлар ва кўкаришлар борлиги кўринади. Шунингдек, болага нисбатан шафқациз муносабатда бўлингани акс этган. Воқеадан хабар топган қўшнилар ички ишлар органларига мурожаат қилганларидан сўнг бола шифохонага олиб борилган.
Боланинг яқинларидан бирининг сўзларига кўра, воқеадан кейин ҳуқуқни муҳофаза қилувчи органларга бир неча бор мурожаат қилинган, аммо тиббий экспертиза ҳам тайинланмаган.
"3 яшар боланинг баданида соғ жойи йўқ. Қўлларини сим билан боғлаб қўйган, сим изларидан қолган жароҳатлар йиринглаб кетган ҳаттоки. Қизиб турган электр плита устига болани ўтқазган, орқаси жуда чуқур, қаттиқ куйган. Одам боласи шундай қиладими? Ҳозир бола операция қилиниб ўз терисидан олиб куйган жойларни ямашди шифокорлар. Лекин шу ваҳшийликни қилган одамга бирор чора кўрилмади шунча кундан бери. На ички ишлар, на прокуратура қарамади. Нарпайга ёзсам, Каттақўрғонда бўлган – уларга ёзинг дейди. Каттақўрғонга ёзсам жимжит. Охири Самарқанд вилоят прокуратурасига ёздик, уларданам бирор нажот бўлмади. Бир ҳафтадан ошяптики, ҳамма жим," – дейди у.
Боланинг яқинлари ҳозир унинг даволаниши билан бирга, унга ким ва қандай шароитда зўравонлик қилганига ҳуқуқий баҳо берилишини кутмоқда.
Воқеа гувоҳларидан бирининг айтишича, энага аввал ҳам бошқа болаларга қараган ва унинг телефонида болаларга нисбатан зўравонлик акс этган видеолар бўлган. Унинг сўзларига кўра, аёл боланинг сочини пинсет билан юлиб, бу ҳолатни телефонга тасвирга олган.
"Шунчалик азоб берганки, боланинг сочини пинсетда битталаб юлиб шахсий телефонига видеога олган. Бу аёл аввал ҳам болаларга қараган уйида, бошқа болаларниям шундай ҳолга солган. Лекин ҳеч ким индамаган, телефонида болачаларнинг калтак оқибатида қонга беланган ҳолатлари тасвирга олинган. Фарзандидан хабар олгани келган ота-оналарга боласи уларни кўрса йиғлашини айтиб дарвозани очмас экан. Баъзи ота-оналар шунинг учун ҳам боласини аҳволидан бехабар бўлган," – дейди гувоҳ.