Самарқанд ва Бухорода сайёҳлик автобус йўналишлари йўлга қўйилади
Самарқандда 2027 йил охиригача туристик шаттлларни, Бухорода — экспресс-автобусларни, Хивагача эса самолёт ва поезд учун ягона чиптани йўлга қўйиш режалаштирилмоқда.
Самарқанд ва Бухорода сайёҳлик автобус йўналишларини ишга тушириш режалаштирилмоқда
Самарқанд ва Бухорода аэропортлар ва темир йўл вокзалларини асосий диққатга сазовор жойлар ва меҳмонхоналар билан боғлайдиган махсус сайёҳлик автобус тармоқларини жорий этиш кўзда тутилмоқда. Бундай чора-тадбирлар Ўзбекистон Президентининг 2030 йилгача маҳаллий йўловчи ташишни ривожлантириш стратегияси тўғрисидаги қарори лойиҳасида белгиланган.
Самарқандда 2027 йил охиригача «Туристик шаттл» экспресс-автобуслари ва ҳалқали йўналишларни ишга тушириш режалаштирилган. Улар халқаро аэропорт, темир йўл вокзали, Регистон майдони, Шоҳи Зинда мажмуаси, «Боқий шаҳар» мажмуаси ва йирик меҳмонхоналарни ўзаро боғлайди.
Бундан ташқари, шаҳарда ягона рақамли сайёҳлик навигацияси тизимини жорий этиш режалаштирилмоқда.
Ушбу чора-тадбирларни амалга ошириш учун Самарқанд вилояти ҳокимлиги ва Транспорт вазирлиги масъулдир. Қўшимча молиялаштириш кўзда тутилмаган.
Бухоро вилоятида 2028 йилнинг февраль ойидан эътиборан «темир йўл вокзали — халқаро аэропорт — Қадимги шаҳар — меҳмонхоналар» йўналиши бўйича экспресс-автобус қатновини ташкил этиш режалаштирилмоқда.
Лойиҳага кўра, автобуслар ушбу нуқталар ўртасида мунтазам қатнаши керак. Буни амалга ошириш ҳам қўшимча маблағ ажратмаган ҳолда Бухоро вилояти ҳокимлиги ва Транспорт вазирлиги зиммасига юкланади.
Алоҳида ташаббусда 2027 йил 1 июлдан эътиборан «Тошкент аэропорти — Урганч аэропорти — Хива темир йўл вокзали» йўналишида пилот ягона чиптани ишга тушириш кўзда тутилган. У авиапарвоз ва темир йўл сафарини бирлаштиради ҳамда «Бир йўл» платформасида ишлайди. Лойиҳани ишга тушириш учун тарифларни ва ташувчилар ўртасида ўзаро ҳисоб-китоб қилиш механизмини ишлаб чиқиш, шунингдек, уларнинг ахборот тизимларини интеграция қилиш талаб этилади.
Ҳужжатда, шунингдек, Тошкентдан Хивага поездда бориш вақтини қисқартириш ҳақида ҳам сўз боради. Ҳозирда йўл илгариги 14 соат ўрнига 7 соат 40 дақиқа вақт олмоқда. Жанубий Кореядан сотиб олинган «Jaloliddin Manguberdi» тезюрар электр поездлари 2026 йилнинг биринчи ярмида «Тошкент — Урганч — Хива» йўналиши бўйича қатнай бошлади.
Транспорт стратегиясининг мақсадли гуруҳлари қаторида ички ва хорижий сайёҳлар қайд этилган. Улар учун аэропортлар, вокзаллар ва сайёҳлик объектлари ўртасидаги алоқани яхшилаш, кўп тилли навигация, ягона мобил илова ва «Бир йўл» платформасидан фойдаланиш кўзда тутилган.