Самарқанд форуми: Ўзбекистон Республикаси Инсон ҳуқуқлари бўйича Миллий марказининг 30 йиллигига бағишланган халқаро тадбир
28 сентябрь куни Ўзбекистон пойтахтида ўз ишини бошлаган Инсон ҳуқуқлари бўйича бешинчи Самарқанд форумининг юқори даражадаги йиғилиши «Халқаро мажбуриятлардан — самарали амалга оширишгача: инсон ҳуқуқлари соҳасидаги миллий имплементация механизмларининг роли» мавзусидаги юбилей йиғилиши билан давом этди. Ушбу тадбир Ўзбекистон Республикаси Инсон ҳуқуқлари бўйича миллий маркази ташкил этилганлигининг 30 йиллигига бағишланди. Олий суд раисининг маърузалари тингланди […]
Самарқанд форуми: Ўзбекистон Республикаси Инсон ҳуқуқлари бўйича миллий марказининг 30 йиллигига бағишланган халқаро тадбир
28 сентябрь куни Ўзбекистон пойтахтида бошланган Инсон ҳуқуқлари бўйича бешинчи Самарқанд форумининг юқори даражадаги йиғилиши «Халқаро мажбуриятлардан — самарали амалга оширишгача: инсон ҳуқуқлари соҳасидаги миллий имплементация механизмларининг роли» мавзусидаги юбилей сессияси билан давом этди. Ушбу тадбир Ўзбекистон Республикаси Инсон ҳуқуқлари бўйича миллий маркази ташкил этилганининг 30 йиллигига бағишланди.
Маърузалар билан Ўзбекистон Республикаси Олий суди раиси Робахон Маҳмудова, Олий Мажлис Қонунчилик палатасининг Демократик институтлар, нодавлат ташкилотлар ва фуқароларнинг ўзини ўзи бошқариш органлари қўмитаси раиси Гулрух Агзамова, Туркия Инсон ҳуқуқлари ва тенглик институти президенти Васип Шаҳин, Таиланд Инсон ҳуқуқлари бўйича миллий комиссари Сучарт Сеттҳамалине, Туркия Республикаси Омбудсмани Эртунч Эркан Балта, Қатар Инсон ҳуқуқлари бўйича миллий комиссияси раиси ўринбосари, Инсон ҳуқуқлари бўйича миллий институтлар Осиё-Тинч океани форуми Раҳбарлик қўмитаси аъзоси Муҳаммад бин Саиф ал-Кувайри, Халқаро Қизил Хоч Қўмитасининг Шарқий Европа ва Марказий Осиё бўйича минтақавий ҳуқуқий координатори Жала Азизова, Халқаро юристлар комиссиясининг Европа ва Марказий Осиё бўйича дастури директори Темур Шакиров, Халқаро тараққиёт ва адолат маркази президенти Азамат Шамбилов сўзга чиқдилар.
Муҳокамаларда, шунингдек, Инсон ҳуқуқлари бўйича миллий институтлар глобал альянси раиси, Марокаш Инсон ҳуқуқлари бўйича миллий кенгаши президенти Амина Буайач, Хитой Инсон ҳуқуқларини ўрганиш жамияти ижрочи вице-президенти Цзян Цзянго, Россия Федерацияси Инсон ҳуқуқлари бўйича вакили Яна Лантратова, Қозоғистон Республикаси Инсон ҳуқуқлари бўйича миллий маркази раҳбари Анвар Сабиров, БМТ Инсон ҳуқуқлари бўйича олий комиссари бошқармаси Инсон ҳуқуқлари бўйича кенгаши ва шартномавий механизмлар бўлимининг Шартномавий органлар салоҳиятини ошириш дастури инсон ҳуқуқлари бўйича ходими Мари-Эв Буайе-Фридрих, «UPR Info» халқаро ноҳукумат ташкилоти Ижроия кенгаши раиси Жанни Магаззени иштирок этдилар ва онлайн тарзда нутқ сўзладилар.
Иштирокчилар таъкидлаганидек, 2026 йил Ўзбекистон Республикаси Инсон ҳуқуқлари бўйича миллий маркази ташкил этилганининг 30 йиллиги йили ҳам бўлади. Ўтган ўттиз йил давомида Миллий марказ инсон ҳуқуқлари соҳасида халқаро стандартларни илгари суриш, Ўзбекистоннинг халқаро мажбуриятлари бажарилишини таъминлаш, БМТнинг инсон ҳуқуқлари бўйича тизимлари билан ҳамкорликни мустаҳкамлаш, шунингдек, инсон ҳуқуқлари соҳасида таълим, тадқиқотлар ва институционал ривожланиш масалаларида етакчи ўринларни эгаллади.
Ушбу юбилей халқаро мажбуриятларни самарали амалий амалга оширишда миллий институтлар, шунингдек, ижро этиш, ҳисобот бериш ва мониторинг қилиш бўйича миллий механизмларнинг роли ва ўрнини баҳолаш учун кенг имкониятлар очади. Шу нуқтаи назардан, ушбу йиғилиш Миллий марказнинг 30 йиллигини нишонлаш билан бир қаторда, инсон ҳуқуқлари бўйича халқаро мажбуриятларни амалга оширишда ижро этиш, ҳисобот бериш ва мониторинг қилиш бўйича миллий механизмларнинг ортиб бораётган роли тўғрисидаги мулоқот учун муҳим майдонга айлангани бежиз эмас.
Муҳокамалар давомида асосий эътибор идоралараро мувофиқлаштириш, миллий механизмлар ва илғор халқаро тажрибага қаратилди. Иштирокчиларнинг фикрига кўра, Форум доирасидаги фаол мунозаралар миллий даражада инсон ҳуқуқлари стандартларини жорий этишни кенгайтириш, тараққиёт ҳуқуқини илгари суриш ва замонавий таҳдидларга қарши курашда глобал бирдамликни мустаҳкамлаш бўйича амалий ечимларни ишлаб чиқишга муносиб ҳисса қўшади.
Инсон ҳуқуқлари бўйича бешинчи Самарқанд форуми доирасида, шунингдек, «Capstone Project Uzbekistan» инсон ҳуқуқлари бўйича таълим дастури ғолибларини тақдирлаш маросими бўлиб ўтди. Ғолибларга мукофотларни Ўзбекистон Республикаси Инсон ҳуқуқлари бўйича миллий маркази директори Акмал Саидов, Нидерландия Қироллигининг Ўзбекистон Республикасидаги элчихонаси миссияси раҳбари ўринбосари Мартин Ван Бюрен ва Халқаро тараққиёт ва адолат маркази президенти Азамат Шамбилов топширдилар.