Саида Мирзиёева Америка бизнесига: «Аниқ лойиҳа ёки муаммонгизни олиб келинг»
Саида Мирзиёева Америка–Ўзбекистон ишбилармонлик ва инвестиция кенгаши йиғилишида ҳар бир иштирокчи компанияга бевосита мулоқот учун масъул бириктирилишини билдирди. У тадбиркорларни аниқ лойиҳалар ва ҳал этилиши керак бўлган муаммолар билан мурожаат қилишга чақирди.
Саида Мирзиёева Америка бизнесига: «Аниқ лойиҳа ёки муаммонгизни олиб келинг»
Ўзбекистон президенти Шавкат Мирзиёев ва АҚШ давлат котиби Марко Рубио қатнашган тадбирда президент администрацияси раҳбари Саида Мирзиёева янги Кенгаш амалий натижа берадиган механизм бўлиши лозимлигини таъкидлади.
Унинг айтишича, ташаббусга Шавкат Мирзиёевнинг Вашингтонда АҚШ президенти Доналд Трамп билан учрашуви вақтида асос солинган. Шундан кейин Ўзбекистон президенти Кенгаш олдига «Натижа бўлсин!» деган қисқа ва аниқ вазифа қўйган.
«АҚШ маъмуриятининг ҳам, бизнинг жамоамизнинг ҳам иш услуби айнан шундай: камроқ сўз, кўпроқ амалий натижа. Биз Америка томонига шунчаки навбатдаги бир қўмита эмас, балки амалда ишлайдиган механизм яратишни ваъда қилган эдик», - деди Саида Мирзиёева.
У июн ойида Тошкентга қарийб 200 та Америка компанияси келганини рекорд сифатида қайд этди. Тўрт ой ўтиб эса давлат котиби бощилигида яна 100 га яқин АҚШ компанияси ташриф буюрганини таъкидлади.
Саида Мирзиёева бизнес учун аниқ қоидалар, очиқ мулоқот ва мурожаатларга тезкор жавоб бериш муҳимлигини айтди.
«Бизнес қоидалар аниқ, эшиклар очиқ ва қўнғироқларга дарҳол жавоб бериладиган жойга интилади. Шу боис биз доимо алоқада бўладиган ва мурожаатларни жавобсиз қолдирмайдиган ҳамкор бўлишга интилмоқдамиз», - деди у.
Шу муносабат билан йиғилишдаги ҳар бир компанияга бевосита мулоқот учун масъул шахс бириктирилиши, тадбиркорлар кўтарган бирор муаммо Кенгаш ҳамраислари эътиборидан четда қолмаслиги ваъда қилинди.
Саида Мирзиёева тадбиркорлар сўровлари асосида қоидалар ўзгартирилганини ҳам маълум қилди. Унинг сўзларига кўра, Ўзбекистон инвестициялари АҚШда янги иш ўринлари яратишга, Америка маҳсулотларининг хариди эса саноат корхоналари фаолиятини қўллаб-қувватлашга хизмат қилмоқда. У шерикликдан ҳар икки томон ҳам фойда кўриши кераклигини таъкидлади.
Нутқда Жексон–Веник тузатиши масаласи ҳам тилга олинди. Саида Мирзиёева Рубио уни «Совуқ уруш сарқити» деб атаганини эслатиб, Ўзбекистон бу чекловнинг тезроқ бекор қилинишини кутаётганини билдирди.
Тадбир бошида у Марко Рубионинг Марказий Осиёга илк сафарини Ўзбекистондан бошлаганини катта эҳтиром сифатида баҳолади. Апрел ойидаги Вашингтон учрашувини эслаб, ўзбек меҳмондўстлиги ҳақида ҳазил ҳам қилди: меҳмонлар кўпинча режалаштирганидан узоқроқ қолиб кетади. У Америка бизнеси учун ҳам Ўзбекистон шундай қадрдон масканга айланишига умид билдирди.