Қирғизистон Мудофаа вазирининг биринчи ўринбосари Талайбек Шаршеев бошчилигидаги ҳарбий делегация Озарбайжонда бўлиб, у ерда мудофаа идораси раҳбарияти билан музокаралар ўтказди ва ҳарбий хизматчиларни тайёрлаш тизими билан танишди.
Ташрифнинг асосий воқеаси Озарбайжон Мудофаа вазири генерал-полковник Закир Ҳасанов билан учрашув бўлди. Томонлар қўшма ҳарбий ўқувлар ва машғулотларни ташкил этиш, профессионал тажриба алмашиш ҳамда қуролли күчларнинг жанговар шайлигини оширишга урғу бериб, икки томонлама ҳамкорликни кенгайтириш истиқболларини муҳокама қилдилар.
Дастурнинг алоҳида блоги ҳарбий таълимга бағишланди. Қирғизистон вакиллари Жамшид Нахчиванский номидаги Ҳарбий-таълим мактаби ва Озарбайжон Миллий мудофаа университетига ташриф буюриб, у ерда таълим дастурларининг хусусиятлари, ўқув инфраструктураси ва офицер кадрларни тайёрлашга бўлган ёндашувлар билан танишдилар.
Бундан ташқари, делегация Ҳайдар Алиев номидаги Ҳарбий институтда бўлиб, у ерда таҳсил олаётган Қирғизистон ҳарбий хизматчилари билан учрашди. ҚР Мудофаа вазирлиги вакиллари уларнинг тайёргарлик шароитлари, ўқув дастурини ўзлаштириши ва ўқиш жараёни билан қизиқдилар.
Озарбайжонда бўлиш давомида делегация Бакудаги Шеҳидлар хиёбонини ҳам зиёрат қилди, у ерда қирғизистонлик ҳарбий хизматчилар «Абадий аланга» ёдгорлигига гул қўйиб, республика мустақиллиги ва ҳудудий яхлитлиги йўлида ҳалок бўлганлар хотирасига ҳурмат бажо келтирдилар.
Икки мамлакатнинг ҳарбий алоқалари 2026 йилга мўлжалланган икки томонлама ҳамкорликнинг алоҳида режаси доирасида ривожланмоқда. Октябрь ойида Бакуга Қирғизистон Махсус операция кучлари делегацияси ташриф буюриб, Озарбайжон махсус кучларининг қурол-аслаҳаси, экипировкаси, жанговар техникаси ва тайёргарлик тактикаси билан танишган эди.