Ҳарбий идоранинг аёл қиёфаси
Қозоғистон Президенти Қасим-Жомарт Тоқаев Татьяна Савельевани мудофаа вазирининг ўринбосари этиб тайинлади. Тегишли фармойиш Оқўрда томонидан эълон қилинди. Т. Савельева Мудофаа вазирлигига давлат молияси ва бюджетни режалаштириш соҳасидаги кўп йиллик иш тажрибаси билан келди.
Тайинлов у Қурултойдан кетганидан сўнг дарҳол юз берди. 6 октябрь куни Марказий сайлов комиссияси у топширган аризадан кейин депутатлик ваколатларини муддатидан олдин тугатиш учун асосни белгилади, 7 октябрь куни эса Қурултой унинг мандатини расман тугатди.
У 1976 йил 11 апрелда туғилган. Оқмола аграр университетини «Иқтисодиёт ва менежмент» мутахассислиги бўйича, сўнгра Евроосиё миллий университетини «Иқтисодиёт» мутахассислиги бўйича тамомлаган.
Давлат органларидаги фаолиятини Остона молия тизимида бошлаган, шундан сўнг молия, иқтисодиёт ва бюджетни режалаштириш вазирликларида ишлаган. Турли йилларда бюджетни ишлаб чиқиш, бюджет дастурларини баҳолаш ва бюджет сиёсати учун масъул бўлган бўлинмалар раҳбари лавозимларида фаолият юритган.
2016 йилдан 2023 йилгача Савельева Қозоғистон молия вице-министри бўлган.
2023 йилда у AMANAT партиясидан VIII чақириқ Мажилис депутати бўлди. 2024 йил февралидан Молия ва бюджет қўмитасига раҳбарлик қилди. 2026 йилда парламент тизими ислоҳ қилинганидан сўнг, Савельева «Әділет» партиясидан Қурултой депутати этиб сайланди ва Молия ва бюджет қўмитаси таркибига кирди.
Моҳият эътибори билан, унинг тайинланиши мудофаа идораси раҳбариятидаги молия-бюджет йўналишини кучайтиради: Савельеванинг профессионал фаолиятининг салмоқли қисми айнан давлат харажатлари ва бюджет дастурларини режалаштириш билан боғлиқ бўлган.
Шу билан бирга, президент мудофаа вазири ўринбосари лавозимидан Аскер Бейсеновни озод этди. У ушбу лавозимни 2023 йил апрелидан буён эгаллаб келаётган эди ва у ҳам Қуролли Кучларда иқтисодиёт, молия ва аудит масалаларига ихтисослашган эди.