Россиялик миллиардерларнинг умумий бойлиги қарийб 20 млрд долларга камайди
Блоомберг Биллионаирес Индех рўйхатидаги россиялик миллиардерлар бойлигининг умумий баҳоси уч ой ичида ўсишдан пасайиш томон ўзгарди. 1-июн куни Тҳе Инсидер рейтингдаги 20 нафар россиялик йил бошидан буён 22 млрд долларга бойиганини ёзган эди.
Россиялик миллиардерларнинг умумий бойлиги қарийб 20 миллиард долларга камайди.
Блоомберг маълумотларига кўра, бу умумий пасайишнинг деярли учдан бир қисми Михаил Прохоров ҳиссасига тўғри келди, унинг бойлиги 6,45 миллиард долларга камайиб, 10,1 миллиард долларни ташкил этди. Владимир Потанин 3,73 миллиард доллар, Алишер Усмонов 2,92 миллиард доллар, Павел Дуров эса 2,56 миллиард доллар йўқотди. Тҳе Инсидер ҳисоб-китобларига кўра, ушбу тўрт нафар тадбиркорнинг бойлиги жами 15,66 миллиард долларга пасайган, бу умумий камайишнинг 79 фоизини ташкил этади.
Йил бошидан буён энг кўп Алексей Мордашов бойиди, унинг бойлиги 1,43 миллиард долларга ошиб, 27,7 миллиард долларга етди. Геннадий Тимченконинг бойлиги 853 миллион долларга ўсиб, 15,1 миллиард долларни, Леонид Михелсоннинг бойлиги эса 460 миллион долларга кўпайиб, 24,1 миллиард долларни ташкил қилди. Блоомберг томонидан бойлиги 10,1 миллиард долларга баҳоланган Дмитрий Риболовлев ўз ҳисобига яна 319 миллион доллар қўшиб қўйган бўлса, Искандар Маҳмудовнинг бойлиги 198 миллион долларга ўсиб, 8,07 миллиард долларга етди.
Рейтингдаги ўзгаришлар унинг иштирокчилари кўрсатилган суммаларни амалда олганини ёки йўқотганини англатмайди. Баҳолашга бир вақтнинг ўзида аксиялар қиймати, рубл курси, оммавий бўлмаган бизнесни қайта баҳолаш ва миллиардерларга тегишли активлар таркибидаги ўзгаришлар ҳам таъсир қилиши мумкин.
Энг йирик бойликлар миқдоридаги ўзгаришлар Россияда бойликнинг ҳаддан ташқари юқори даражада тўпланиши фонида юз бермоқда. Июл ойида УБС мамлакатни мулкий тенгсизлик даражаси бўйича дунёда Бирлашган Араб Амирликларидан кейин иккинчи ўринга қўйди. Хусусий капиталнинг жамланиш даражасини кўрсатувчи Жини коеффициенти 2025-йил якунларига кўра Россияда 0,82 ни ташкил этди, бунда максимал мумкин бўлган қиймат 1 га тенг.