Россиялик диссидент Гарри Каспаров АҚШ уни ҳаётига таҳдид борлигидан огоҳлантирганини айтди
"Путин ҳокимиятда экан, оилам ва мен ҳақиқий хавфсизликда бўлмаймиз", дейди шахмат бўйича собиқ жаҳон чемпиони.
Россиялик диссидент Гарри Каспаров АҚШ уни ҳаётига таҳдид борлигидан огоҳлантирганини айтди
Гарри Каспаров Россияда сиёсий мухолифат ҳаракатларини ташкил этиш учун 2005 йилда профессионал шахматни тарк этган эди
АҚШда истиқомат қилувчи, сургундаги россиялик мухолифатчи АҚШ ва Литва хавфсизлик хизматлари уни ҳаёти хавф остида эканлигидан огоҳлантирганини айтди.
Шахмат бўйича собиқ жаҳон чемпиони Гарри Каспаров эҳтиёт чораларини кўриш тавсия этилган икки диссидентдан бири бўлганини ва бу чораларни аллақачон кўриб қўйганини маълум қилди.
Унинг бу баёноти шу ой бошида АҚШ Адлия вазирлиги томонидан Кремлга алоқадор тармоқда ишлайдиган беш кишига нисбатан айблов хулосаси очиқланганидан кейин янгради. Улар АҚШ ва бошқа мамлакатларда ҳужумлар ва қотилликлар уюштиришни режалаштирганликда айбланмоқда, бунда асосий нишон сифатида россиялик диссидентлар ва қочқинлар кўрсатилган.
Каспаров ўзининг «The Next Move» нашрида ёзишича, унга ва «Озод Россия форуми» ҳаммуассиси Иван Тютринга уларнинг бевосита нишон эканлиги айтилмаган, бироқ иккаласи ҳам хавфсизлик борасида огоҳлантирилган.
Испаниянинг «El Mundo» газетаси қўлга киритган маълумотларга таяниб хабар беришича, Каспаров ва яна бир россиялик мухолифатчи Илья Пономарев ёз фаслида АҚШ расмийлари томонидан ушбу фитна ҳақида огоҳлантирилган.
Каспаровга яқин манбаларга таяниб, газета у АҚШга кўчиб ўтганидан бери илк бор шу ёзда кучайтирилган ҳимоя остига олинганини ёзди.
Каспаров алоҳида шундай деб ёзди: «Мен тўхтамайман ва яширинмайман, ҳатто бунинг иложи бор деб ўйлаганимда ҳам.
Оилам ва мен, токи [Россия президенти Владимир] Путин Россияда ҳокимиятда экан, ҳақиқий хавфсизликда бўлмаймиз — бу миллионлаб одамларга тегишли вазиятдир».
Каспаров 2005 йилда сиёсат билан шуғулланиш учун профессионал шахматни тарк этди ва 2013 йилда Россиядан қочиб кетишдан олдин Путинга очиқдан-очиқ қарши чиққан ҳаракатларга асос солди.
Ўшандан бери у ортга қайтмаган. Россия 2022 йилда Украинага кенг кўламли бостириб киришидан кейин уни «хорижий агент» деб эълон қилди, кейинроқ эса 2024 йилда террорчилар ва экстремистлар рўйхатига қўшди — у бу иккала ёрлиқни ҳам рад этади.
Хабарларда айтилган яна бир нишон — Пономарев 2014 йилда Қримнинг ноқонуний аннексия қилинишига қарши овоз берган ягона Россия Давлат думаси депутати бўлган ва кейинроқ Украинага сургунга кетган.
У «Moscow Times» нашрига ушбу фитна ҳақида огоҳлантирилганини тасдиқлаш ёки инкор этишдан бош тортди, бироқ бу айбловлар Россия томонидан «эскалациянинг янги даражаси» эканини айтди.
АҚШ Адлия вазирлигининг билдиришича, Россия разведка хизматларига ишлайдиган шахслар тармоғи камида 2024 йилдан бери фаол бўлиб келган.
Унга кўра, «RIS Network» деб аталувчи ушбу тармоқ бутун дунё бўйлаб россиялик диссидентлар ва қочқинларга қарши ҳужумлар ва қотилликларни режалаштирган ва амалга оширган.
Миллий хавфсизлик бўйича бош прокурор ёрдамчиси Жон А. Эйзенбергнинг айтишича, тармоқнинг беш нафар аъзоси «АҚШ ҳудудигача етиб борган глобал қотиллик тармоғи таркибида ҳаракат қилиб, Кремль топшириғига биноан қотилликларни амалга ошириш учун АҚШ фуқаролари ва хорижликларни ёллашга уринганликда» айбланмоқда.
Фитналарни ташкил қилганликда айбланаётган беш киши: Юрий Храмеев, Кирилл Храмеев, Оэмис Ромагоза Дуррути, Яйдель Дельгадо Суарес ва Анхель Эдуардо Кастродир.
Адлия вазирлиги бешала шахс ҳам ҳануз озодликда эканини маълум қилди.
Кремль матбуот котиби Дмитрий Песков айблов хулосаси очиқланганда, «бирор бир ишончли далил» ёки «аниқ фактлар»ни эшитмагунча ёки кўрмагунча бу айбловларга изоҳ бермаслигини айтди.