Россияда ўлат тарқалгани ҳақидаги хабарлардан сўнг Қирғизистон чегарада санитария назоратини кучайтирди

Қирғизистон Россияда ўлат ҳақидаги хабарлардан сўнг чегарада санитария назоратини кучайтирди

Қирғизистон Иркутск вилоятида ўлатга чалиниш эҳтимоли бўлган ҳолат ҳақидаги хабарлардан сўнг Россия билан чегарада санитария назоратини кучайтирди. Шу билан бирга, расмийлар Россиядан киришга ёки назорат-ўтказиш пунктлари фаолиятига чекловлар жорий этмади.

Қўшимча чора-тадбирлар ҳақида 4 октябрь куни Қирғизистон Соғлиқни сақлаш вазирлиги маълум қилди. Кучайтирилган назорат одамлар, транспорт ва юкларга тааллуқли бўлиб, ўта хавфли инфекцияларнинг кириб келиши ва тарқалишининг олдини олишга қаратилган.

Амалдаги санитария-эпидемиология назорати қоидалари келаётганлардан соғлиғининг ҳолати тўғрисида сўров ўтказишни ва визуал кўрикдан ўтказишни назарда тутади. Эпидемиологик кўрсатмалар мавжуд бўлганда термометрия ўтказилиши мумкин, юқумли касалликка шубҳа қилинган шахс аниқланганда эса — уни изоляция қилиш ва эпидемияга қарши чора-тадбирлар амалга оширилади.

Назоратни кучайтиришга Иркутск вилоятининг Шелехов шаҳридаги вазият сабаб бўлди, у ерда Иркутск ўлатга қарши илмий-тадқиқот институти ходимаси вафот этган. Россия нашрларида ўлим сабаби сифатида ўлат кўрсатилган, Бурятия раҳбари Алексей Цыденов ҳам аёл ушбу касалликдан вафот этганини оммавий равишда маълум қилган.

Вазият ҳақидаги хабарлар фонида Россия президенти матбуот котиби Дмитрий Песков миш-мишлар ва тасдиқланмаган мулоҳазаларга эмас, балки Роспотребнадзорнинг расмий баёнотларига таянишга чақирди. Идоранинг ўзи вафот этган ходимада унинг касбий фаолияти билан боғлиқ микроорганизмлар аниқланмаганини, у билан алоқада бўлган одамларни текшириш эса юқумли патология билан боғлиқ соғлиқ ҳолатида ўзгаришларни аниқламаганини маълум қилди.

Роспотребнадзор, шунингдек, Иркутск вилоятидаги санитария-эпидемиологик вазият барқарор бўлиб қолаётганини билдирди. Аввалроқ вилоят губернатори Игорь Кобзев хавфли юқумли касаллик аниқлангани ва эпидемияга қарши чора-тадбирлар ўтказилаётгани ҳақида хабар берган эди.

Ўзбекистон Санэпидқўмитаси ҳам Иркутск вилоятида ўлатга чалиниш эҳтимоли бўлган ҳолат ҳақидаги хабарлар фонида хизматларнинг шайлигини кучайтирди.