Россияда ўлат гумони ҳақидаги хабарлардан сўнг Трамп ёрдам ваъда қилди
АҚШ президенти Доналд Трамп Иркуцк вилоятида ўлат бўлиши мумкинлиги ҳақидаги хабарлар ортидан Россияга ёрдам беришга тайёрлигини билдирди. Россия расмийлари эса вафот этган беморга сабаби аниқланмаган пневмония ташхиси қўйилганини маълум қилган. Ўлат тарқалгани ҳақидаги тахминлар тасдиқланмаган.
Россияда ўлат гумони ҳақидаги хабарлардан кейин Трамп ёрдам беришга ваъда берди
Трамп 5-октабр куни журналистлар саволларига жавоб берар экан, Вашингтон Иркуцк вилоятидаги вазиятни синчковлик билан кузатаётганини айтди.
«Биз ёрдам берамиз. Бундай муаммога дуч келган ҳар қандай томонга доим ёрдам берамиз», - деди АҚШ президенти.
Шу билан бирга, Трамп бу масала юзасидан Россия расмийлари билан ҳали алоқага чиқмаганини ҳам қайд этди. Ёрдамнинг аниқ шакли ва қачон кўрсатилиши ҳақида маълумот берилмади.
Ўлат бўлиши мумкинлиги ҳақидаги хабарлар Иркуцк ўлатга қарши институтида ишлаган 28 ёшли Даря Шипилованинг вафотидан сўнг тарқалди. У сентабр охирида шифохонага ётқизилган ва 2-октабр куни вафот этган. Роспотребнадзор унга «келиб чиқиш сабаби аниқланмаган пневмония» ташхиси қўйилганини маълум қилган.
Маҳаллий ОАВларга кўра, воқеадан кейин қарийб 200 киши карантинга олинган. Ижтимоий тармоқларда лабораторияда ўлат қўзғатувчиси сақланган пробирка синиб кетгани ҳақидаги тахминлар ҳам тарқалган.
Бироқ Роспотребнадзор институтда патоген микроорганизмлар билан ишлаш жараёнида ҳеч қандай авария ҳолати аниқланмаганини билдирди. Идора маълумотига кўра, бемордан олинган намуналарда унинг касбий фаолияти билан боғлиқ микроорганизмлар ҳам топилмаган.
Идоранинг кейинги баёнотида Иркуцк вилоятида санитария-эпидемиологик вазият осойишта экани, бемор билан мулоқотда бўлганларнинг 60 фоизи устидан тиббий кузатув якунлангани айтилди. Текширувларда икки кишида СОВИД-19 ва яна икки кишида риновирус инфексияси аниқланган, бошқа инфексия қўзғатувчилари топилмаган.
Кремл матбуот котиби Дмитрий Песков ҳам журналистларни Роспотребнадзор баёнотларига таянишга чақирди ва ҳодиса тафсилотларини муҳокама қилмади.
Иркуцкдаги воқеалар ҳақидаги хабарлар ортидан Марказий Осиё мамлакатларида ҳам эҳтиёт чоралари кучайтирилмоқда. Қозоғистон ва Қирғизистон санитария-карантин назоратини кучайтирган.
Ўзбекистонда эса ўта хавфли инфексияларнинг мамлакатга кириб келиши ва тарқалишининг олдини олиш учун тегишли хизматлар шайлиги оширилган. Санепидқўмита вазият расмий маълумотлар асосида кузатилаётганини билдириб, аҳолини тасдиқланмаган хабарларга ишонмасликка чақирган.