Россия Запорижжяга дронлар билан зарба берди
19-августга ўтар кечаси Россия қўшинларининг Запорижжя шаҳрига учувчисиз учиш аппаратлари билан ҳужуми оқибатида бир киши ҳалок бўлди, яна олти киши жароҳатланди. Турар жой ва бошқа биноларга зарар етган, ҳужумдан сўнг ёнғин келиб чиққан.
Россия Запорижжя шаҳрига дронлар ёрдамида ҳужум қилди. Бу ҳақда Запорижжя вилояти ҳарбий маъмурияти раҳбари Иван Фёдоров хабар берди. Унинг сўзларига кўра, Россия дронларининг зарбалари натижасида шаҳардаги турар жой бинолари ва бошқа объектлар шикастланган.
Ҳужумдан сўнг объектлардан бирида ёнғин келиб чиққан. Дастлабки маълумотларга кўра, ушбу ҳужум оқибатида бир киши ҳаётдан кўз юмган, олти киши эса турли даражадаги жароҳатлар олган.
Фёдоров вайроналар остида одамлар қолиб кетган бўлиши мумкинлигини таъкидлади. Воқеа жойида қутқарув ва фавқулодда хизматлар фаолият олиб бормоқда.
Шунингдек, тун давомида Запорижжяга бошқариладиган авиация бомбаларидан зарба бериш хавфи ҳақида огоҳлантириш эълон қилинган эди. Айрим Украина нашрлари шаҳарга қилинган ҳужумда дронлар билан бир қаторда бошқариладиган авиабомбалар ҳам қўлланилганини маълум қилмоқда.
Ҳужум оқибатлари ва жабрланганлар ҳақидаги маълумотларга аниқлик киритиш ишлари давом этмоқда.