Россия янги космик стансия учун уч йилда 136 млрд рубл ажратмоқчи
Россия орбитал стансиясини яратиш ва унинг эксплуатациясини таъминлаш учун 2027–2029-йилларда федерал бюджетдан жами 136,72 млрд рубл ажратиш режалаштирилмоқда. Шундан қарийб 38,6 млрд рубли 2027-йилга тўғри келади.
Россия янги космик стансия учун уч йил давомида 136 млрд рубл ажратишни режалаштирмоқда. Бу ҳақдаги маълумотлар Россия федерал бюджети лойиҳасига илова қилинган материалларда келтирилган.
Режага кўра, 2027-йил учун ажратиладиган маблағларнинг бир қисми Россия орбитал стансияси — РОС лойиҳасини амалга ошириш учун зарур инфратузилмани ривожлантиришга йўналтирилади. Хусусан, космик мажмуанинг ер усти инфратузилмасини яратиш учун қарийб 2,1 млрд рубл ажратиш кўзда тутилган. Стансияни барпо этиш учун зарур обьектларнинг капитал қурилишига эса яна қарийб 2,36 млрд рубл режалаштирилган.
Бюджет лойиҳасининг тушунтириш хатида «Экипажли космонавтика» федерал лойиҳаси бўйича харажатлар ҳам қайд этилган. Унга кўра:
2027-йилда — қарийб 112,46 млрд рубл;
2028-йилда — қарийб 107,8 млрд рубл;
2029-йилда — қарийб 119,5 млрд рубл ажратилиши режалаштирилмоқда.
Бу кўрсаткичлар кенгроқ «Экипажли космонавтика» лойиҳасига тегишли бўлиб, уларнинг барчаси фақат орбитал стансия қурилишига мўлжалланмаган.
РОС бўйича келтирилган 136,72 млрд рубл ҳам стансиянинг бутун қурилиш давридаги якуний қийматини англатмайди. Бу 2027–2029-йилларда уни яратиш ва эксплуатациясини таъминлаш учун бюджет лойиҳасида назарда тутилган маблағдир.