Исроил ер юзидаги нишонларни йўқ қилишга қодир космик қуроллар ишлаб чиқишни режалаштирмоқда — ОАВ
Исроил ер юзидаги нишонларни йўқ қилишга қодир космик қуроллар ишлаб чиқишни режалаштирмоқда — ОАВ
Исроил Мудофаа вазирлиги кўп йиллик бюджет режаси доирасида космик соҳада ҳужумкор салоҳиятни ривожлантиришни мақсад қилган. Бу режага Исроил сунъий йўлдошларини душман космик аппаратларидан ҳимоя қилувчи тизимлар ҳамда космосдан ер юзидаги нишонларга зарба бера оладиган қуролларни яратиш киради. Бу ҳақда Тҳе Жерусалем Пост газетаси хабар берди.
Газетанинг ёзишича, режада мавжуд имкониятларни кенгайтириш, жумладан, космосдан разведка олиб бориш ва алоқа тизимларини такомиллаштириш ҳам кўзда тутилган. Космосдаги ҳужумкор фаолият учун алоҳида маблағ ажратилиб, бу Исроилнинг космик соҳадаги мавқейини мустаҳкамлашга қаратилган кенг кўламли саъй-ҳаракатларнинг бир қисми бўлади.
Биринчи йўналиш — Исроил мудофаа кучларининг космосдан разведка олиб бориш имкониятларини бир неча қатламда кенгайтириш. Бу бир сутка давомида, ҳар қандай об-ҳаво шароитида ва бир вақтнинг ўзида турли ҳудудларда операциялар олиб бориш имконини бериши кўзда тутилган. Иккинчи йўналиш эса мудофаа тизими учун кенг қамровли, барқарор ва узлуксиз алоқа имкониятларини яратишдан иборат.
Бундан ташқари, ҳужумкор космик операциялар учун ҳам алоҳида маблағ ажратилади. Бу йўналиш икки асосий вазифани қамраб олади: биринчиси — Исроил сунъий йўлдошларини душман сунъий йўлдошларидан ҳимоя қилувчи қуроллар ҳамда космосдан ер юзидаги нишонларга зарба бера оладиган қуроллар. Иккинчиси Исроил ҳудудини ҳимоя қилиш ва душман кучларига зарба бериш учун мўлжалланади.
Ушбу лойиҳаларни амалга ошириш учун Исроил Мудофаа вазирлигининг Мудофаа тадқиқотлари ва ривожлантириш бошқармаси (МАФАТ), Исроил мудофаа кучлари ва мамлакат мудофаа саноати вакиллари режалаштириш ҳамда ишлаб чиқиш жараёнини олиб бормоқда.
**“Бўкираётган шер” операцияси жараённи тезлаштирди**
Лойиҳани жадаллаштираётган омиллардан бири — 2026-йил феврал ойида Эронга қарши бошланган “Бўкираётган шер” (Роаринг Лион) операцияси бўлган. Ушбу операция давомида Мудофаа вазирлиги ва Исроил мудофаа кучлари космосдан аниқ разведка маълумотларини тўплаш учун сунъий йўлдошлардан фойдаланишни кенгайтирган. Бу уруш давомида нишонлар базасини шакллантириш имкониятларини кучайтирган.
2026-йил 28-февралда АҚШ ва Исроил Эронга қарши янги кенг кўламли операцияни бошлаган. Исроил уни Оператион Роаринг Лион (“Бўкираётган шер”), АҚШ эса Оператион Эпис Фурй (“Эпик ғазаб”) деб атаган эди.
Мудофаа вазири Исроил Кац ёпиқ йиғилишларда космик соҳани тез ва жиддий равишда ривожлантириш, душман давлатлар устидан устунликка эришиш ҳамда Исроилни бу борадаги дунёдаги етакчи беш давлат қаторига олиб чиқиш зарурлигини таъкидлаган.
Кацнинг фикрича, космик имкониятлар келажакдаги можароларда Исроил мудофаа кучларига стратегик устунлик беради ва армия фақат Ҳарбий разведка ҳамда Ҳарбий-ҳаво кучларига таяниб қолмайди.
“Космик йўналиш бизга кундузи ҳам, кечаси ҳам суратга олиш, булутларни ёриб ўтиш ва юқори аниқликда тасвирга олишнинг қўшимча имкониятларини яратади”, деган Кац “Офек-19” сунъий йўлдоши ҳақида гапирар экан.
**Космосда хавфсизлик устунлиги**
Исроил Мудофаа вазирлигининг Космик бошқармаси раҳбари Ави Бергернинг айтишича, “Бўкираётган шер” операцияси Исроилнинг космик соҳасида “жуда катта сакраш”ни юзага келтирган.
Бергер космик соҳадаги технологик лойиҳалари учун Исроил Мудофаа мукофотига сазовор бўлган. Унинг сўзларига кўра, мукофот “Офек-13” ва “Офек-19” сунъий йўлдошларини учириш билан боғлиқ лойиҳалар учун берилган.
Унинг тушунтиришича, бу икки сунъий йўлдош САР — радар сунъий йўлдошлари ҳисобланади. Уларнинг технологияси оддий электрооптик тасвирга асосланган сунъий йўлдошлардан фарқ қилади. Анъанавий тасвирга олишда сунъий йўлдошлари ер юзасидан қайтган қуёш нуридан фойдаланиб тасвир ҳосил қилинади. САР сунъий йўлдоши эса тасвирни ўзи яратади: у Ер томон электромагнит нурланиш юборади ва ер юзасидан қайтган сигнал махсус технология орқали қайта ишланиб, разведка маълумотларини олиш имконини берадиган синтетик тасвир ҳосил қилади.
“Исроил давлати, албатта, космосда хавфсизлик устунлигини яратиши керак. Шундагина Исроил мудофаа кучлари ва мудофаа тизимига ҳаракат эркинлигини таъминлай оламиз” деган у.