Россия Украинага ракета ва дронлар билан ҳужум қилди
25-августга ўтар кечаси Россия Украинага ракета, бошқариладиган авиабомбалар ва учувчисиз учиш қурилмалари билан ҳужум қилди. Украина маҳаллий ҳокимиятлари маълумотларига кўра, Запорижжя ва Харкивда жами уч киши ҳалок бўлган, Киевда эса бир аёл жабрланган. Шунингдек, Молдова билан чегарадаги назорат-ўтказиш пункти ва Херсондаги Қизил Хоч омборига зарба берилгани хабар қилинди.
Россия Украинага ракета ва дронлар билан ҳужум қилди.
Запорижжя вилояти ҳарбий маъмурияти раҳбари Иван Федоровнинг хабар беришича, 25-август куни эрта тонгда Запорижжяга бошқариладиган авиабомбалар билан зарба берилган. Бу ҳужум оқибатида икки киши ҳалок бўлган. Ҳужум натижасида автомобил йўлининг қатнов қисмига зарар етган ва очиқ ҳудудда ёнғин чиққан. Бундан аввал, 24-август кечқурун шаҳарга дронлар билан ҳужум қилинган бўлиб, кўп қаватли уйга зарар етган ва хонадонлардан бирида ёнғин чиққан.
Харковда эса ракета зарбаси оқибатида бир киши ҳаётдан кўз юмган. Шаҳар мери Игор Тереховнинг сўзларига кўра, зарба Харкив жанубидаги Основянский тумани саноат ҳудудига берилган. Шунингдек, Харкивнинг Киевский туманига ҳам учувчисиз қурилмалар билан ҳужум уюштирилгани маълум қилинди.
Киевнинг Голосеевский туманида дрон парчаларининг 16 қаватли турар жой биносига тушиши натижасида деворлар шикастланган ва деразалар синган. Шаҳар мери Виталий Кличконинг маълум қилишича, бир аёл жабрланган.
Днепр шаҳрида ҳам зарбалар қайд этилган. Украина ОАВнинг дастлабки маълумотларига кўра, йирик "Караван" савдо-кўнгилочар маркази яқинида зарба тушган ва ёнғин чиққан.
Чернихив вилоятининг Корюковский туманида эса корхоналардан бири ҳужумга учраган. Украина Давлат фавқулодда вазиятлар хизмати маълумотларига кўра, натижада 3 минг квадрат метрдан ортиқ майдонда ёнғин юзага келган. Йўл ва ўрмон хўжалиги обьектлари, шунингдек, хусусий корхоналар ҳудудида ҳам ёнғинлар қайд этилган. Улар ўчирилган, жабрланганлар ҳақида маълумот берилмаган.
**Молдова чегарасидаги назорат пунктига зарба**
Украина Давлат чегара хизмати Молдова билан чегарадаги назорат-ўтказиш пунктларидан бирига яна ҳужум қилинганини маълум қилди. Хабарга кўра, Шаҳед дронлари "Виноградовка" автомобил назорат-ўтказиш пунктига зарба берган. Оқибатда у ерда ёнғин чиққан ва пункт фаолияти вақтинча тўхтатилган. Фуқаролар бошқа назорат-ўтказиш пунктларига йўналтирилиши айтилган.
**Қизил Хочнинг гуманитар омбори ҳам зарар кўрди**
24-август кечқурун Қизил Хоч матбуот хизмати Херсондаги ташкилот омборига Россия дронлари билан ҳужум қилинганини билдирди.