“Россия музокаралар учун урушни тўхтатмайди” — Лавров

“Россия музокаралар учун урушни тўхтатмайди” — Лавров

Россия Украина билан музокара олиб боришга тайёр, бироқ бу жараёнда урушни тўхтатмайди. Бу ҳақда Россия ташқи ишлар вазири Сергей Лавров БРИКС саммити ўтаётган Ню Деҳлида маълум қилди.

“Агар (Владимир Зеленский) учрашмоқчи бўлса, (Москвага) келсин”, деди Лавров.

Унинг бу баёноти Украина президенти россиялик ҳамкасби билан Маямида учрашишга тайёрлигини айтганидан сўнг янгради. Зеленский декабр ойида ўтказилиши режалаштирилган Г20 саммитида Путин билан музокараларга тайёрлигини билдирган.

Путиннинг матбуот котиби Дмитрий Песков эса бу учрашувни “имконсиз” деб атаган. У президентлар ўртасидаги музокара фақат Россия пойтахтида бўлиб ўтишини айтмоқда. Кремлда музокаралар учун муқобил жой кўриб чиқиляптими, деган саволга Песков “У (Зеленский – таҳр.) билан Москвада учрашишга тайёрмиз”, деб жавоб берган.

Зеленский ва Путин 2022-йил февралида Россиянинг Украинага кенг кўламли босқини бошланганидан бери шахсан учрашмаган. Россия президенти 2019-йилдан буён Г20 саммитларида қатнашмайди. Сентябр бошида АҚШ президенти Доналд Трампнинг махсус вакиллари Стив Уиткофф ва Жаред Кушнер тинчлик музокараларини қайта бошлаш мақсадида Москва ва Киевга ташриф буюрди. Кейинчалик хорижий нашрлар музокарачилар ташрифи ҳеч қандай натижа бермаганини ёзди.