Россия Киевга ҳужумларни тиклади, Украина эса Саратовга ҳужум қилди (видео)

Россия Киевга ҳужумларни қайта бошлади, Украина эса Саратовга зарба берди (видео)

8-сентябрга ўтар кечаси Россия қўшинлари Киев шаҳрига ракета ҳужуми уюштирди. Шу куни Украина дронлари Саратов вилоятига ҳужум қилди.

Киев мери Виталий Кличко берган маълумотга кўра, пойтахтнинг олтита туманида маъмурий бинолар, омборлар, таълим муассасалари ва турар жойлар шикастланган. Россия зарбалари оқибатида икки киши ҳалок бўлган, ўн киши жароҳат олган. Шифокорлар жабрланганлардан икки нафарининг аҳволини оғир деб баҳоламоқда.

Украина Ҳаво кучлари қўмондонлиги маълумотига кўра, Киевга ҳужумда турли русумдаги ракеталар ва уриб тушириш қийин бўлган реактив дронлардан фойдаланилган. Россия қўшинлари 5-7-сентябр кунлари — АҚШ президентининг элчилари Стив Уиткофф ва Жаред Кушнернинг Украинага ташрифи вақтида — Киевга ҳужум қилмаган эди.

Саратов вилояти губернатори Роман Бусаргин сўзларига кўра, дронлар ҳужуми натижасида бир нечта хусусий уй зарар кўрган. Жами 10 киши, жумладан уч нафар бола жароҳатланган, улардан олти нафари шифохонага ётқизилган. Аҳоли учун вақтинчалик яшаш пунктлари ташкил этилган.

Украинанинг Эхиленова+ ва Супернова+ мониторинг Телеграм каналлари дронлар Саратов нефтни қайта ишлаш заводига зарба берганини билдирди. Шунингдек, Энгелс шаҳридаги ҳарбий аеродром ҳам нишонга олингани айтилмоқда.

Россия Мудофаа вазирлиги 8-сентябр куни эрталаб бир кеча давомида Россия ҳудуди ва аннексия қилинган Қрим осмонида Украинанинг 384 та дрони йўқ қилинганини маълум қилганди.