Россия 2040 йилга бориб уран қазиб олиш жаҳон ҳажмининг учдан бир қисмини ўз назоратига олиши мумкин
Россия 2040 йилга бориб дунё уран қазиб олиш ҳажмининг учдан бир қисми устидан назорат ўрнатиши мумкин
Яқин 15 йил ичида Россия дунё уран қазиб олиш ҳажмининг учдан бир қисмини тўғридан-тўғри ёки билвосита назорат қилиши мумкин. Буюк Британиянинг Centre for Strategic Advantage (CSA) таҳлилчилари шундай хулосага келишди.
Тадқиқотчилар маълумотларига кўра, агар фақат РФ ҳудудининг ўзида қазиб олинган уран ҳисобга олинса, унинг жаҳон бозоридаги улуши 2024 йилда тахминан 5 фоизни ташкил этган. Аммо "Росатом" таркибига кирувчи ва Қозоғистон, Танзания, Намибия ҳамда Нигерда хомашё қазиб олувчи Uranium One компаниясининг халқаро лойиҳалари инобатга олинса, 2024 йилда дунё қувватларининг қарийб 25 фоизи Россия назоратида бўлган. Таҳлилчилар прогнозига кўра, 2040 йилга бориб бу кўрсаткич 36 фоизгача ошиши мумкин.
Financial Times экспертларининг таъкидлашича, сўнгги йилларда жаҳондаги паст нархлар ва заиф талаб туфайли ғарб давлатлари уран конларини ўзлаштиришга инвестицияларни қисқартирган. Шу билан бирга, яқин истиқболда уранга бўлган талабнинг ошиши кутилмоқда.
Соҳа вакиллари қазиб олиш ҳажмини ошириш учун давлатнинг узоқ муддатли кафолатлари зарурлигини айтмоқдалар. Америка Қўшма Штатлари 2024 йил май ойида Россиядан уран импорт қилишга тақиқ жорий этди (бунда 2028 йилгача истиснолар бўлиши мумкин), бироқ чекловлар "Росатом" тузилмаси томонидан РФ ташқарисида қазиб олинадиган уранга тааллуқли эмас.
Европа Иттифоқида Россия урани импорти тақиқланмаган.
2024 йил 26 март куни "Навоийуран" ДК ва "Техснабэкспорт" "Ураниум Оне Гроуп" АЖ билан ҳамкорлик тўғрисида битим имзолади.
Эслатиб ўтамиз, 2026 йил март ойи охирида Жиззах вилоятида бўлажак АЭС майдончасида дастлабки бетонлаш ишлари бошланди — қурувчилар РИТМ-200Н кичик қувватли реактори биноси пойдеворини қуйишга киришдилар. Ўзбекистондаги атом электр станцияси лойиҳаси мамлакатнинг узоқ муддатли иқтисодий ва технологик ривожланишининг асосий элементи сифатида кўрилмоқда.