Роналду ўзбошимчалиги учун 255 евро жаримага тортилди
Португалия футбол федерацияси (ПФФ) интизомий кенгаши Криштиану Роналдуни миллий жамоа қароргоҳини ўзбошимчалик билан тарк этгани учун жазолади. Ҳужумчи регламентнинг 160-моддаси 1-банди бўйича бир марталик қасддан интизомий ҳуқуқбузарлик содир этганликда айбдор деб топилди. У 30 кунга дисквалификация қилинди ва 255 евро миқдорида жаримага тортилди.
Роналду ўзбошимчалиги учун 255 евро миқдорида жаримага тортилди
Роналду 30-сентабр куни Копенҳагенда Данияга қарши ўйин олдидан миллий жамоани тарк этди. Бунга янги бош мураббий Жорже Жезушнинг 41 ёшли ҳужумчига асосий таркибдаги жойини кафолатламаслиги ҳақидаги оммавий баёноти сабаб бўлди. 6-октабр куни футболчи баёнот бериб, қарорини изоҳлади ва мураббийни ваъдаларини бузганликда айблади.
9-октабр куни интизомий иш очилди, шундан кейин кенгаш футболчини дисквалификация қилиш ҳақида қарор чиқарди. Иш шошилинч мақом олди. Эртаси куни ҳужжатлар интизомий тергов комиссиясига топширилди.
160-модда йиғинларни асоссиз тарк этганлик учун бир ойдан олти ойгача дисквалификацияни назарда тутади. Профессионал футболчи учун тахминан 500 евродан 1000 еврогача жарима ҳам белгиланган. Амалдаги жазо энг енгил вариант бўлди, жарима эса белгиланган миқдордан ҳам паст чиқди.
Дисквалификация Роналдуга Саудия Арабистонининг «Ан-Наср» клубида ўйнашга тўсқинлик қилмайди. Аввалроқ Жезуш ҳужумчининг миллий жамоага қайтишини истисно қилмаганди. Роналду 30 кунлик муддат сабаб миллий жамоанинг бирорта ўйинини ўтказиб юбормаслиги айтилмоқда. Унинг дисквалификацияси 30-сентабрдан бошлаб ҳисобланади.
Португалия миллий жамоаси Миллатлар Лигаси доирасида 14-ноябр куни ўз майдонида Дания, 17-ноябр куни эса сафарда Уелс билан ўйнаши керак.