Романовлар сулоласи раҳбари Тошкентдаги Николай Константиновичнинг тарихий саройига ташриф буюрди

Россия императорлик хонадони раҳбари буюк княгиня Мария Владимировна Тошкентдаги буюк князь Николай Константиновичнинг собиқ саройида бўлди, у ерда ҳозирда реставрация ишлари олиб борилмоқда. Ишлар якунлангач, у ерда Ўзбекистон Давлат санъат музейининг доимий экспозицияга эга филиалини очиш режалаштирилган.

Ташриф 3 октябрь куни бўлиб ўтди. Мария Владимировна Маданият ва санъатни ривожлантириш жамғармаси раиси Гаяне Умерова билан учрашув ўтказди ва саройни реставрация қилиш ишлари қандай кетаётгани билан танишди. Объект бўйлаб кўздан кечиришни у учун жамғарма раиси ўринбосари Саидазиз Ишанхўжаев олиб борди.

Бундан ташқари, томонлар халқаро илмий ва маданий ҳамкорлик масалаларини муҳокама қилдилар.

Россия императорлик хонадони матбуот хизмати хабар беришича, Мария Владимировна Николай Константинович хотирасини сақлаб қолаётгани учун Ўзбекистон томонига миннатдорчилик билдирди ва унинг мероси Ўзбекистон учун катта аҳамиятга эга эканини таъкидлади.

Эслатиб ўтамиз, июль ойида президент Шавкат Мирзиёев маданият ва санъат соҳасидаги лойиҳалар билан танишган эди, улар орасида саройда Ўзбекистон Давлат санъат музейи филиалини ташкил этиш ҳам бор эди. Реставрация давомида бинонинг тарихий қиёфасини сақлаб қолиш режалаштирилган. Ишлар якунлангач, бу ерда 300 га яқин музей ашёларидан иборат доимий экспозиция жойлаштирилади.

Романовлар саройи 2021 йилдан бери реставрация учун ёпиқ. 2026 йилнинг май ойида объект ҳудудида ёпиқ мода намойиши ўтказилганидан кейин унинг атрофида жамоатчилик эътирози юзага келган эди. Маданият ва санъатни ривожлантириш жамғармаси ўшанда тадбир фақат туташ ҳудудда бўлиб ўтгани ва саройнинг ички хоналарига дахл қилмаганини тушунтирган эди.