Роғун ГЭС қурилиш майдончасида тупроқ ўпирилиб тушди, жабрланганлар бор

Роғун ГЭС қурилиш майдонида тупроқ ўпирилиб тушди, жабрланганлар бор

Тожикистондаги Роғун гидроэлектр станцияси қурилишида туннеллардан бирида тупроқ ўпирилиб тушди. Гувоҳларнинг сўзларига кўра, бешдан ортиқ ишчи жабрланган. Ҳодиса 22 октябрда юз берган, бироқ жабрланганларнинг аҳволи ҳақидаги расмий маълумотлар ҳозирча эълон қилинмаган.

ОАВ хабар беришича, станция ходимларидан бири ўпирилишни туннель ёнидаги қояли участкани ўзлаштириш пайтида тупроқ ва тошларнинг тўпланиб қолгани билан боғлаган.

Унинг сўзларига кўра, кейинчалик тўпланган сув туфайли ушбу масса ўпирилиб тушган. У содир бўлган воқеани "қурилиш сифати билан боғлиқ бўлмаган тасодиф" деб атади, аммо шу билан бирга жабрланганлар ҳақидаги маълумотни тасдиқламади ҳам, инкор этмади ҳам.

Хавфсизлик нуқтаи назаридан исмларини ошкор этмасликни сўраган гувоҳлар журналистларга тупроқ босиб қолиши оқибатида бир неча киши қолганини айтиб беришди. Роғун ГЭС вакиллари ҳозирча содир бўлган воқеа юзасидан изоҳ беришмади.

Роғун ГЭС қурилишидаги хавфсизлик масалалари илгари ҳам кўтарилган эди. Жумладан, 2024 йил ноябрь ойида қурилиш майдонида авария юз бериб, унинг оқибатида уч нафар ишчи ҳалок бўлган, яна бир киши жароҳат олган эди.

2025 йилда қурилиш хавфсизлиги бўйича муҳокамалар давом этди. Лойиҳада иштирок этаётган Эрон компанияси ходими сифатсиз материаллардан фойдаланилган бўлиши мумкинлигини айтди. Бошқа бир ходим эса, аксинча, халқаро молия ташкилотлари ишлар сифатини ҳар куни текшираётганини таъкидлади.

Ўша йили Тожикистон расмийлари Роғун ГЭСда саккизта бахтсиз ҳодиса юз берганини маълум қилиб, жабрланганлар ва ҳалок бўлганлар сонига аниқлик киритилмаган эди.

Роғун ГЭС Вахш дарёсида қурилмоқда ва Тожикистоннинг стратегик лойиҳаларидан бири ҳисобланади. Қурилиш якунлангач, баландлиги 335 метр бўлган тўғон дунёдаги энг баландига айланиши керак. Станция ҳар бирининг қуввати 600 мегаваттдан бўлган олтата гидроагрегатни ўз ичига олади.

Ҳозирда иккита агрегат ишламоқда, учинчисини ишга тушириш 2027 йил сентябрь ойига мўлжалланган. Жаҳон банки лойиҳа учун 300 миллион доллар ажратди, яна 500 миллион доллар Осиё тараққиёт банкидан кутилмоқда. Қурилишни тўлиқ якунлаш 2035 йилга режалаштирилган. Расмийлар янги ГЭС мамлакатдаги электр энергияси танқислигини камайтиришга ёрдам беришидан умид қилмоқда.