Қозоғистонлик тинчликпарвар кучлар тўрт ой давомида Жўлан тепаликларида 470 та операция ўтказди

Қозоғистон тинчликпарвар кучлари тўрт ой давомида Жўлан тепаликларида 470 та операция ўтказди

Қозоғистон тинчликпарвар контингенти Бирлашган Миллатлар Ташкилотининг Ажратиш чизиғини кузатиш бўйича кучлари (UNDOF) таркибидаги дастлабки тўрт ойлик хизмати давомида Жўлан тепаликларида 470 та тезкор тадбирни амалга оширди, деб хабар берди мамлакат Мудофаа вазирлиги.

19 сентябрь куни Қозоғистоннинг учинчи миллий тинчликпарвар контингенти Жўлан тепаликларидаги БМТ миссияси таркибида хизмат бошлаганига тўрт ой тўлди. UNDOF мандатига кўра, қозоғистонлик тинчликпарвар кучлар ўзларига бириктирилган ҳудудда патруллик қилади, вазиятни кузатади ва тезкор ҳаракат қилиш кучларини жойлаштиришга шай ҳолатда ушлаб туради.

Контингент, шунингдек, зарурат туғилганда кузатув пунктларини кучайтириш, БМТ ходимларини эвакуация қилиш ҳамда БМТ вакиллари ва юкларини кузатиб бориш учун ҳам юборилади. Июнь ойидан сентябрь ойигача контингентнинг портловчи моддаларни зарарсизлантириш гуруҳи 350 та портловчи буюмни аниқлади ва йўқ қилди. Шунингдек, ушбу давр мобайнида гуруҳ ўқотар қуроллар учун мўлжалланган 1800 та ўқ-дорини йўқ қилди.

Умумий ҳисобда, қозоғистонлик тинчликпарвар кучлар тўрт ойлик давр мобайнида 470 та тезкор тадбир ўтказди. Бунга 379 та патруллик ва 49 та вақтинчалик тунги кузатув пунктларини ташкил этиш киради.

Контингент, шунингдек, тезкор ҳаракат қилиш кучларининг 11 та машғулотини ўтказди ва маҳаллий жамоатчилик вакиллари билан 11 та учрашув ташкил этди. Қозоғистон тинчликпарвар контингенти UNDOF мандати остида Жўлан тепаликларида ўз вазифаларини бажаришни давом эттирмоқда.