Қўшма Штатлар Эроннинг Қешм оролига зарба берганини маълум қилди
Вашингтон буни минтақадаги ўз обьектларининг мудофааси билан изоҳлади. Трамп сўнгги ҳафталарда Ислом Республикасига ҳужумлар қайта бошланишига шама қилаётган эди.
Қўшма Штатлар Эроннинг Қешм оролига зарба берганини билдирди
АҚШ расмийси 2-ноябр куни мамлакат Қуролли кучлари Ҳурмуз бўғозидаги Эроннинг Қешм оролига зарбалар берганини маълум қилди. Бу ҳақда Реутерс хабар берди.
Дастлаб Тҳе Валл Стреет Жоурнал нашри хабар қилган бу ҳужумлар чекланган характерга эга бўлган ва кенг кўламли ҳарбий операцияларнинг қайта бошланишини англатмайди.
Яна бир расмийнинг айтишича, зарбалар Эронга тегишли “ер-ҳаво” синфидаги ракеталардан АҚШ обьектларига қарши фойдаланилганига жавобан, мудофаа мақсадида амалга оширилган. Марказий қўмондонлик (СЕНТСОМ) ҳозирча бу ҳужумлар юзасидан изоҳ бермади.
2-ноябр куни эрталаб Эроннинг ИРНА давлат ахборот агентлиги Қешм оролида бир нечта портлашлар юз берганини маълум қилди. Фох Невс телеканали ҳам манбаларга таяниб, зарбалар АҚШ самолётига қарата ўқ узилганига жавобан мудофаа мақсадида берилганини билдирди.
Сўнгги ҳафталарда Қўшма Штатлар президенти Доналд Трамп бугун, 3-ноябр куни бўлиб ўтадиган оралиқ сайловлардан кейин Эронга қарши ҳужумларни қайта бошлашга ишора қилиб келмоқда. Бироқ 2-ноябр куни Линколн хотира мажмуаси ҳовузи олдида сўзлаган нутқидан сўнг, у бу борада бошқача фикрда эканига ишора қилди.