Қорақалпоғистонда янги газ-конденсат кони очилди. Видео
Қорақалпоғистонда янги газ-конденсат кони аниқланди. Видео
Қорақалпоғистоннинг Мўйноқ туманида янги «Қоратов» газ-конденсат кони аниқланди. Устюртнинг марказий қисмида олиб борилган геология-қидирув ишлари натижасида табиий газ ва конденсатнинг саноат миқёсидаги оқими олинди.
Мутахассислар «Қоратов» майдонидаги биринчи қидирув қудуғини 4 860 метр чуқурликкача бурғиладилар. 3 октябрь куни 3 213 метрдан 3 273 метргача бўлган чуқурликдаги қуйи юра ётқизиқларини синаш жараёнида углеводородларнинг саноат миқёсидаги оқими қайд этилди, бу эса янги кон очилганини расман тасдиқлади.
Заҳираларни аниқлаштириш ва тузилмасини ўрганиш мақсадида йил якунига қадар иккинчи қидирув қудуғини бурғилашни якунлаш, шунингдек, учинчи ва тўртинчи қидирув-разведка қудуқларини қазишни бошлаш режалаштирилган.
Олинган натижалар Устюрт минтақасидаги чуқур жойлашган қатламларни кейинчалик ўрганиш учун янги истиқболли йўналишларни белгилаш имконини беради.
Бундан ташқари, Сурхондарё вилоятининг Бойсун туманидаги «Мустақилликнинг 25 йиллиги» газ конида авариявий қудуқни тугатиш бўйича амалий ишлар бошланди. Мураккаб техник-технологик операцияларни амалга ошириш учун Хитойнинг CNPC корпорацияси мутахассислари жалб этилган.