ҚазЕТА филтрлари

**QazETA филтрлари**

Қозоғистон Республика Қозоғистон билан визасиз режим амал қиладиган мамлакатлар фуқаролари учун киришга пуллик электрон рухсатномаларни босқичма-босқич жорий этишни бошлади. Ўзбекистон ва Қозоғистон ўртасида ҳам визасиз режим амал қилгани сабабли, янги қоидалар Ўзбекистон фуқароларига ҳам дахл қилади.

QazETA — бу хорижий фуқаролар учун давлат рақамли платформаси бўлиб, у орқали «ягона дарча» тамойили бўйича асосий миграция хизматларидан фойдаланиш мумкин. Платформа 2026 йил январ ойида ишга туширилган ва ҳали ҳам пилот режимида ишламоқда. Ҳозирда QazETA орқали бир нечта хизматлар, жумладан, электрон виза (E-Visa) ва ETA расмийлаштириш имконияти мавжуд.

Electronic Travel Authorization (ETA) рухсатномасини QazETA рақамли платформаси орқали расмийлаштириш керак бўлади. Ариза сафардан камида 72 соат олдин топширилиши лозим. Рухсатнома 180 тақвим куни давомида амал қилади ва ушбу муддат ичида Қозоғистонга бир неча бор кириш имконини беради.

Рухсатномани расмийлаштириш учун тўлов ундирилади. Бунда унинг миқдори Қозоғистон ҳукумати томонидан белгиланиши керак. Тахмин қилинишича, QazETA орқали расмийлаштирилганда кириш рухсатномаси 3900 тенге — тахминан 100 минг сўм туради. Агар у тўғридан-тўғри чегарада расмийлаштирилса, қиймати 7800 тенгени ёки тахминан 200 минг сўмни ташкил этади.

QazETA сайтидаги маълумотларга кўра, қуйидагилар кириш учун электрон рухсатнома олишдан озод этилади: 16 ёшдан кичик ва 65 ёшга тўлган шахслар; дипломатик ва хизмат паспортлари эгалари; расмий делегациялар аъзолари; Қозоғистон визасига ёки мамлакатда яшаш гувоҳномасига эга бўлган хорижий фуқаролар.

Халқаро аэропортларнинг транзит ҳудудида 3 кунгача бўлган транзит йўловчиларга ETA расмийлаштириш талаб этилмайди.

25 августдан 1 ноябргача тизим тест режимида ишлайди. Ушбу даврда хорижликлар Қозоғистонга ETA'сиз киритилади, бироқ чегарачилар уларни кейинги кириш учун рухсатнома олиш зарурлиги ҳақида огоҳлантиради.

1 ноябрдан бошлаб Қозоғистонга самолётда келувчи хорижликлар учун электрон рухсатнома мажбурий бўлади.

Хитой, Туркманистон ва Ўзбекистон томонидан ЕОИИ ташқи чегарасини автомобил ёки автобусда кесиб ўтиш учун ETA 15 ноябрдан бошлаб талаб қилинади.

30 ноябрдан бошлаб талаб ЕОИИ ички чегараларидаги — Россия ва Қирғизистон билан автомобил ўтиш пунктларига тарқалади. Поезд ёки денгиз транспортида келувчи йўловчилар учун электрон рухсатнома 15 декабрдан бошлаб мажбурий бўлади.

Қозоғистон элчихоналари хабарларида қайд этилишича, электрон рухсатноманинг мавжудлиги хорижий фуқаронинг Қозоғистонга киришини кафолатламайди. Мамлакатга киритиш тўғрисидаги якуний қарорни чегара назорати вақтида ваколатли давлат органи қабул қилади.

Қозоғистоннинг визасиз мамлакатлар фуқаролари учун пуллик электрон рухсатномаларни жорий этиш режалари ҳақида август ойи бошида маълум бўлган эди. Ўшанда Қозоғистон ИИВ қарор лойиҳасини эълон қилиб, тизим 2026 йилнинг август ойидан декабр ойигача жорий этилишини маълум қилганди.

Ўша пайтда жорий этишнинг аниқ босқичлари ва рухсатнома қиймати ҳақида расмий маълумотлар эълон қилинмаган эди.