Қашқадарёда 500 минг аҳолига мўлжалланган Янги Қарши шаҳри барпо этилади. Лойиҳа ҳақида нималар маълум
Қарши шаҳри, Кўкдала ва Қарши туманлари чегарасида 500 минг аҳолига мўлжалланган Янги Қарши шаҳрини қуриш режалаштирилмоқда. Лойиҳа 5000 гектар майдонни эгаллайди. Президент халқаро архитектура компанияларини жалб этган ҳолда икки ой муддатда бош режани ишлаб чиқишни топширди. Шунингдек, 235 гектар майдонда «Янги Насаф» экомажмуаси пайдо бўлади.
Қашқадарёда 500 минг аҳолига мўлжалланган Янги Қарши пайдо бўлади. Лойиҳа ҳақида нималар маълум
Ўзбекистон президенти Шавкат Мирзиёев 22 октябрь куни Қашқадарё вилоятини ижтимоий-иқтисодий ривожлантиришга бағишланган йиғилишда аҳоли ўсиши ва замонавий уй-жойга бўлган талаб фонида янги шаҳар барпо этиш режаларини маълум қилди.
Янги Қарши (Yangi Qarshi) шаҳрини Қарши шаҳри, Кўкдала ва Қарши туманлари чегарасидаги 5000 гектар майдонда қуриш назарда тутилган. Шаҳар 500 минг аҳолига мўлжалланган.
Бундан ташқари, Қарши туманида канал бўйида 235 гектар майдонда «Янги Насаф» экологик комплекси қурилиши бошланади.
Янги ҳудудларнинг бош режасини тайёрлаш учун етакчи архитектура компанияларини жалб этиш режалаштирилмоқда. Замонавий шаҳарсозлик ечимларини назарда тутувчи ҳужжатни икки ой муддатда ишлаб чиқиш топширилди.
Бош режани ишлаб чиқиш учун биринчи босқичда 20 млрд сўм ажратилади.
Президент топшириғига кўра, янги ҳудудларда кўп қаватли турар жой бинолари, савдо ва бизнес марказлари қурилиши назарда тутилган. Лойиҳалаш ва қуришда «яшил» ва «ақлли» шаҳар тамойиллари қўлланилиши керак.
Янги Қарши қурилишининг бошланиш ва якунланиш муддатлари, зарур инвестицияларнинг умумий ҳажми ва молиялаштириш манбалари ҳозирча аниқлаштирилмаган.
2025 йил февраль ойида Вазирлар Маҳкамаси Қарши шаҳрининг 2042 йилгача бўлган бош режасини тасдиқлаган эди. Ҳужжат вилоят маркази ҳудудини Косон, Қарши ва Кўкдала туманлари ерлари ҳисобидан кенгайтиришни назарда тутади.
Тасдиқланган бош режага кўра, шаҳар майдони 2030 йилга келиб 8308,9 гектардан 11 026,8 гектарга ва 2042 йилга келиб 16 073,6 гектарга етказилиши керак. Шу тариқа, ушбу давр мобайнида Қарши ҳудуди деярли икки бараварга — 7767 гектарга кенгайиши керак.
Бош режани ишлаб чиқувчиларнинг ҳисоб-китобларига кўра, аҳоли сони 2030 йилга келиб 283,15 минг кишидан 400 минг кишига ва 2042 йилга келиб 470 минг кишига кўпайиши керак.
Ҳужжат, шунингдек, уй-жой фондини кенгайтириш, муҳандислик коммуникациялари, транспорт ва ижтимоий инфратузилмани ривожлантириш ҳамда янги яшил ҳудудларни барпо этишни назарда тутади.
Хусусан, уй-жой фондининг умумий майдони 2030 йилга келиб 3,99 млн кв. метрдан 7,2 млн кв. километрга ва 2042 йилга келиб 10,81 млн кв. километрга кўпайиши керак.
2025 йилда тасдиқланган бош режа мавжуд Қаршини кенгайтиришни назарда тутган бўлса, 22 октябрда эълон қилинган лойиҳа 5 минг гектар майдонда алоҳида Янги Қарши шаҳрини барпо этишни назарда тутади. Ушбу режалар қандай мувофиқлаштирилиши ва амалдаги бош режани қайта кўриб чиқиш талаб этиладими-йўқми, ҳозирча аниқлаштирилмаган.
«Янги Насаф» экологик комплекси қурилиши илгари президентнинг 2026 йил 13 мартдаги Қашқадарё вилоятини ижтимоий-иқтисодий ривожлантиришни жадаллаштириш чора-тадбирлари тўғрисидаги қарорида назарда тутилган эди.
Ҳужжатда халқаро молия институтлари маблағларини жалб этган ҳолда, Қарши тумани ҳудудидан ўтувчи Қарши магистрал каналининг уч километрлик қисми бўйлаб комплекс ташкил этиш назарда тутилган эди.
Эндиликда президент 235 гектар майдонда комплекс қурилиши бошланганини эълон қилди.
Йиғилишда, шунингдек, ҳудудда яшил майдонларни кенгайтиришнинг алоҳида тизими — «Қашқадарё тажрибаси»ни жорий этиш таклиф қилинди.
Ҳар йили Наврўз байрами арафасида вилоятда «Энг яшил маҳалла» танлови ўтказилади. Ғолибларни электромобиллар ва бошқа қимматбаҳо совғалар билан мукофотлаш режалаштирилмоқда.
Йиғилиш якунида президент вилоят ва туманлар ҳокимларининг ҳисоботларини тинглади, шунингдек, жамоатчилик вакиллари билан мулоқот қилди.