Путин Украина билан урушни кучайтиришга тайёрланмоқда – Блоомберг
Блоомберг нашрининг таъкидлашича, Россияда Путин тактик ядро қуролини қўллаши мумкин, деб ҳисоблайдиган амалдорлар сони ортиб бормоқда.
Путин Украина билан урушни кучайтиришга тайёрланмоқда – Блоомберг
Блоомберг нашрининг Кремлга яқин манбаларига кўра, Россия тинчлик музокаралари боши берк кўчага кириб қолганини баҳона қилиб, Украинага ҳужумларни кучайтиришга ҳозирлик кўрмоқда.
Агентлик суҳбатдошлари қуйидагиларни маълум қилди:
* Россия Киевга, жумладан, Украина пойтахти марказига, шунингдек, мамлакатнинг бошқа шаҳарларидаги инфратузилма обьектларига оддий баллистик ракеталар билан зарбаларни кучайтириш имкониятини кўриб чиқмоқда.
* Россия президенти Владимир Путин иқтисодий санксиялар ва Украинанинг Россия нефтни қайта ишлаш заводлари ҳамда логистикасига бераётган зарбалари босими остида урушни тўхтатмайди.
* Москва Украина зарбаларини тобора кўпроқ НАТО давлатларининг ҳужумлари сифатида баҳоламоқда, чунки алянсга аъзо мамлакатлар Киевга қурол-яроғ ва разведка маълумотларини етказиб бермоқда.
* Тинчлик музокараларининг барча механизмлари барбод бўлди, оқибатда ҳар икки урушаётган томон дастлабки нуқтага қайтди. Кремл уруш давомида аллақачон ён босганини ва бу ён беришларнинг ҳар бири Россия позициясини заифлаштирганини даъво қилмоқда. Дипломатик алоқалар мавжуд бўлмаган шароитда Москва Россияга ўз ҳарбий мақсадларига эришиш имконини берадиган можарони янада кучайтиришдан бошқа муқобил йўлларни кўрмаяпти.
* Украина зарбаларининг шиддати ортгани сабабли россиялик амалдорларнинг тобора кўпроғи Путин охир-оқибат кескин чорага – Украинада тактик ядро қуролини қўллашга ўтиши мумкин, деб ҳисобламоқда.
Блоомберг нашрининг қайд этишича, Россиянинг Украинада тактик ядро қуролини қўллашга тайёрланаётганига ишора қилувчи ҳеч қандай аломат йўқ. Илгари Россия Украинанинг Ғарбдаги иттифоқчиларини қўрқитишга уриниб, бир неча бор ядровий таҳдидларни қилган.
Берлиндаги Россия ва Евроосиёни ўрганиш бўйича Карнеги маркази директори Александр Габуев нашрга берган изоҳида Москванинг тактик ядро қуролини қўллаш хавфи ўта паст даражада қолаётганини таъкидлади.
Россия президенти матбуот котиби Дмитрий Песков журналистларнинг шу ҳақдаги сўровига жавоб бермади.