Путин Италия банкига Россиядаги бизнесининг бир қисмини сотишга рухсат берди
Россия президенти Владимир Путин Италиянинг УниСредит гуруҳига Россиядаги шуъба банкини қайта ташкил этиш ва аксияларини сотишга рухсат берди. Режага кўра, бизнес иккига ажратилади: бир қисми Италия гуруҳи назоратида қолади, қолган қисми эса БААдаги инвесторга сотилади.
Путин Италия банкига Россиядаги бизнесининг бир қисмини сотишга изн берди
5-октабр куни эълон қилинган фармойиш «ЮниКредит Банк» таркибидан алоҳида компания ажратиб чиқариш ва банкнинг УниСредитъга тегишли 100 фоиз аксияси бўйича битим тузишга рухсат беради.
Ҳужжатда бу битимлар учун Россия қонунчилигида кўзда тутилган бошқа рухсат ва келишувларни олиш шарт эмаслиги қайд этилган. Шунга қарамай, рухсат берилгани сотув якунланганини англатмайди.
УниСредит 2026-йил 7-майда Россиядаги фаолиятининг бир қисмини сотиш бўйича дастлабки, мажбурий кучга эга бўлмаган келишув имзолаганини билдирган. Харидор Бирлашган Араб Амирликларидаги хусусий инвестор экани айтилган, бироқ унинг номи ошкор қилинмаган.
Гуруҳнинг расмий баёнотига кўра, Россиядаги банк фаолиятининг бир қисми янги юридик шахсга ўтказилади. Янги банкнинг барча аксиялари УниСредитъда қолади, қолган бизнесни ўз ичига олган банк эса харидорга тўлиқ сотилади.
Италия гуруҳи Россиядаги фаолиятини асосан халқаро тўловларга йўналтиришни режалаштирмоқда. Бунда санксияларга тушмаган Россия ва Ғарб корпоратив мижозларининг, аввало, евро ва АҚШ долларидаги операцияларига хизмат кўрсатиш назарда тутилган.
Компания битимни 2027-йилнинг биринчи ярмида якунлашни мўлжаллаган. Бунинг учун мажбурий кучга эга ҳужжатларни имзолаш, бизнесни ажратиш жараёнини амалга ошириш ва тегишли регуляторлар талабларини бажариш зарурлиги таъкидланган.
Аввалроқ, 2025-йил майида ОАВ БААда рўйхатдан ўтган Асас Сапитал, Мада Сапитал ва Инвеаста компаниялари УниСредитънинг Россиядаги бизнесини сотиб олишга қизиқиш билдиргани ҳақида ёзган эди.
ДВ маълумотларига кўра, Инвеаста асосчиси Андрей Елинсон 2023-йилгача «Алфа-групп»нинг инвестиция бўлинмаси — А1ъда бошқарувчи ҳамкор бўлган. Бироқ ушбу компаниялардан бирортаси ҳозирги битим харидори экани тасдиқланмаган.
УниСредит Россиянинг 2022-йилда Украинага кенг кўламли ҳужумидан кейин ҳам мамлакатда фаолиятини давом эттирган йирик Ғарб банкларидан бири бўлиб қолган. Европа регуляторлари гуруҳдан Россиядаги иштирокини қисқартиришни талаб қилиб келган.
Айни пайтда Россияда «дўст бўлмаган» давлатлар инвесторларига тегишли банк аксиялари билан битимлар учун президентнинг махсус рухсати талаб қилиниши сотув жараёнини мураккаблаштирган. Путиннинг янги фармойиши УниСредит режалаштирган қайта ташкил этиш ва сотув учун ана шундай рухсатни беради.