Прокурорлар Ник Рейнер ота-онасини ўлдирганликда айбдор деб топилса, унга нисбатан ўлим жазосини талаб қилмайдиган бўлди
Лос-Анжелес округ прокурорининг маълум қилишича, прокурорлар бу қарорга «синчковлик билан ўтказилган текширувдан» сўнг ва Рейнерлар оиласи яқинларининг истакларини инобатга олган ҳолда келишган.
Прокурорлар ота-онаси — Голливуд режиссёри Роб Райнер ва унинг рафиқаси Мишель Райнерни ўлдиришда айбланаётган Ник Райнер агар айбдор деб топилса, унга нисбатан ўлим жазосини талаб қилмайди.
Лос-Анжелес округ прокурори Натан Хочманнинг маълум қилишича, бундай қарор «синчковлик билан ўтказилган таҳлилдан сўнг» ва Райнерлар оиласи яқинларининг истакларини инобатга олган ҳолда қабул қилинган.
«Биз Ник Райнернинг ака-опалари билан гаплашдик (ва) улар ўз фикрларини жуда аниқ билдиришди», — деди Хочман чоршанба куни бўлиб ўтган суд олди эшитувидан олдин журналистларга.
Прокурорларнинг таъкидлашича, бу Ник Райнер айбдор деб топилган тақдирда олиши мумкин бўлган энг оғир жазо шартли равишда озод қилиш ҳуқуқисиз умрбод қамоқ жазоси бўлишини англатади.
Хочман, шунингдек, сешанба куни суд жараёни 2026 йилда бошланмаслигини айтди.
Роб ва Мишель Райнер ўтган йили Лос-Анжелесдаги уйида пичоқлаб ўлдирилган ҳолда топилган эди. Хабарларга кўра, уларнинг жасадларини 14 декабрь куни қизлари Роми топган.
Ўша пайтда Лос-Анжелес округи тиббий эксперти эр-хотин «кўплаб ўткир тиғли жароҳатлар» оқибатида вафот этганини маълум қилганди.
Уларнинг кенжа ўғли, 33 ёшли Ник ўша куни Лос-Анжелесда ҳибсга олинган. У қотиллик бўйича ўз айбини тан олмаган.
78 ёшли Роб Райнер «Бу — Spinal Tap» (This Is Spinal Tap), «Малика келин» (The Princess Bride), «Гарри Саллини учратганда» (When Harry Met Sally) ва «Менинг ёнимда қол» (Stand By Me) каби фильмларга режиссёрлик қилган.
70 ёшли Мишель Сингер Райнер актриса, фотосуратчи ва продюсер, шунингдек, «Reiner Light» фотоагентлиги ва продюсерлик компанияси асосчиси эди.