Президент Тинубу Саудия Арабистонига ташрифи чоғида «Нигерия ҳақига дуо қилади»
У сўнгги бор Маккага 2022 йилда, Нигерия президенти бўлиш учун сайлов кампаниясини олиб бораётган пайтида ташриф буюрган эди.
Президент Тинубу Саудия Арабистонига ташрифи чоғида «Нигерия ҳақига дуо қилади»
Президент Бола Тинубу иккинчи муддатга ўз номзодини қўймоқда ва ўтган дам олиш кунлари унинг партияси сайловолди кампаниясини бошлади.
Нигерия президенти Бола Аҳмед Тинубу Саудия Арабистонининг Макка шаҳрига Ғарбий Африка мамлакати ҳақига дуо қиладиган кичик ҳаж — умра зиёратини амалга ошириш учун йўл олмоқда, деб хабар беради президент маъмурияти.
Ушбу сафар 74 ёшли президентга «руҳий поклик, эътиқод ҳамда Нигерияда тинчлик, бирлик, барқарорлик ва изчил тараққиётни сўраб дуо қилиш» имконини беради, деди унинг матбуот котиби Байо Онануга.
Нигерия жанубидан бўлган мусулмон Тинубу охирги марта 2022 йилда, Нигерия президентлиги учун сайловолди кампаниясини олиб бораётган пайтда умра зиёрати учун Саудия Арабистонига борган эди.
Набатдаги сайловлар январ ойида бўлиб ўтади ва мамлакатдаги кенг тарқалган хавфсизлик муаммолари сайловолди кампаниясининг асосий мавзусига айланди.
Онануганинг баёнотида айтилишича, президент «Нигерия ва унинг халқига Аллоҳдан ҳидоят ва барака сўраб, умра билан боғлиқ диний амалларни бажаради».
Йилига бир марта белгиланган саналарда бўлиб ўтадиган ва имконияти етган мусулмонлар умрида камида бир марта амалга ошириши шарт бўлган Ҳаждан фарқли ўлароқ, умрани исталган вақтда бажариш мумкин ва у қисқароқ диний амаллар тўпламини ўз ичига олади.
Шу билан бирга, Тинубунинг медиа ёрдамчиси Олусегун Дада ташрифнинг ҳақиқий мақсади президентнинг тиббий кўрикдан ўтиши экани ҳақидаги тахминларни рад этди.
Ўтган дам олиш кунларида иқтидордаги Бутун Нигерия тараққиёт конгресси (APC) партиясининг сайловолди кампанияси очилишида биринчи хоним Олуреми Тинубунинг Тинубунинг оғзига ниманидир солаётгани акс этган видео ижтимоий тармоқларда тарқалгач, президентнинг саломатлиги кенг муҳокама қилинган эди.
Ушбу ҳодиса юзасидан расмий изоҳ берилгани йўқ.
X ижтимоий тармоғидаги постида Дада президентнинг сафари «мамлакат учун дуо қилиш» ва «яна бир йирик сиёсий сафар»ни бошлар экан, қайта сайланиш ҳаракатини «Аллоҳнинг қўлига топшириш» мақсадида амалга оширилаётганини айтди.
АҚШда жойлашган Pew тадқиқот маркази томонидан ўтказилган сўровномага кўра, нигерияликларнинг 90% дан ортиғи дин уларнинг ҳаётида «жуда муҳим» эканини айтади — бу дунёдаги энг юқори кўрсаткичлардан биридир.
Африканинг энг кўп аҳолиси бўлган Нигерия давлати деярли тенг равишда христианлар ва мусулмонларга, шунингдек, оз сонли анъанавий эътиқод эгаларига бўлинган.
«Бу мусулмонлар орасида бирор муҳим сафарга чиқиш ёки бир босқичга эришиш олдидан қилинадиган одатий амалиётдир», деди Дада ва Тинубу охирги марта 2022 йилда APC партиясининг президентлик праймеризларидан олдин кичик ҳаж амалини бажарганини қўшимча қилди.
Набатдаги сайловлар 16 январга белгиланган бўлиб, унда Тинубунинг асосий рақиблари яна бир бор собиқ вице-президент Атику Абубакар ва Анaмбра штатининг собиқ губернатори Питер Оби бўлади.
Сайловолди кампанияси бошлангани сабабли, иқтисодиёт ва хавфсизликнинг йўқлиги сайловчиларни ташвишга солаётган асосий масалалардир.
Мамлакат бир қатор хавфсизлик таҳдидлари, жумладан исломчилар исёни, талон-торож қилувчи ва тўлов эвазига одамларни ўғирлайдиган жиноятчи тўдалар (маҳаллий тилда «бандитлар» деб аталади) ҳужумлари, ер учун тўқнашувлар ва сепаратистларнинг тартибсизликлари билан курашмоқда.