Президент Нукуснинг янгиланган кўчаси бўйлаб сайр қилди ва аҳоли билан мулоқот қилди (+фото, видео)
Президент Нукуснинг янгиланган кўчаларидан бирида сайр қилди ва аҳоли билан суҳбатлашди. Бир гуруҳ йигитлар гитара жўрлигида қўшиқ куйлашди. Бу ерда умумий узунлиги 2,5 км бўлган учта кўча — Гарезсизлик, Сабир Камалов ва Гулхан Шеразиева кўчаларининг ҳудудлари ободонлаштирилди. Пиёдалар йўлаклари кенгайтирилди, ўриндиқлар ўрнатилди, кўчатлар экилди.
Президент Нукуснинг янгиланган кўчаси бўйлаб сайр қилди ва аҳоли билан мулоқот қилди (+фото, видео)
Жума куни кечқурун Ўзбекистон президенти Шавкат Мирзиёев Нукуснинг янгиланган кўчаларидан бирида сайр қилди.
Давлат раҳбари матбуот хизмати хабар беришича, бу ерда умумий узунлиги 2,5 км бўлган учта марказий кўча — Гарезсизлик, Собир Камалов ва Гулхан Шеразиева кўчаларининг ҳудудлари ободонлаштирилди.
Қиймати 2,2 млрд сўмлик лойиҳа доирасида пиёдалар учун қулай муҳит яратилди: кенг йўлаклар, ёритиш тизими, ўриндиқлар ва чиқинди қутилари пайдо бўлди, кўчатлар экилди. Шунингдек, узунлиги 1,5 км бўлган дренаж тармоғи қайтадан қурилди.
Хабарда қайд этилишича, ушбу кўчаларда тадбиркорлик фаолияти фаоллашди — янги дўконлар, хизмат кўрсатиш ва умумий овқатланиш шохобчалари очилди, мавжудлари эса ўз ишини кенгайтирди.
У аҳолидан янгиланган кўча уларга ёқдими-йўқми, деб сўради. Аҳоли ижобий жавоб берди. Давлат раҳбари уларга энг эзгу тилакларини билдирди.
«Сизга катта раҳмат, муҳтарам президент! Сизни яхши кўрамиз!» — дея ҳайқирди бир аёл. «Раҳмат! Мен ҳам сизни жуда яхши кўраман», — деб жавоб берди Шавкат Мирзиёев.
Бир гуруҳ ёшлар гитара жўрлигида Озодбек Назарбековнинг Ватанга садоқат ҳақидаги «Мендирман» қўшиғини ҳам ижро этишди. Президент уларни қарсаклар билан олқишлади ва миннатдорлик билдирди.