Президент Андижондаги гастрономик кўча ва йўл ўтказгични кўздан кечирди
Президент Шавкат Мирзиёев Андижонда узунлиги 1,2 км бўлган гастрономик кўча билан танишди. Лойиҳа қиймати 18 млрд сўмни ташкил этди. У шунингдек, вокзал яқинидаги қиймати 271 млрд сўмлик йўл ўтказгични кўздан кечирди. У туфайли шошилинч тиббий ёрдам марказигача бўлган йўл 14 дақиқага қисқарди.
Президент Андижондаги гастрономик кўча ва йўл ўтказгични кўздан кечирди
Чоршанба куни кечқурун Ўзбекистон Президенти Шавкат Мирзиёев Андижонда ташкил этилган гастрономик кўча билан танишди.
Узунлиги 1,2 км бўлган лойиҳа Машраб ва Сариқўй кўчаларини қамраб олди. Унинг қиймати 18 млрд сўмни ташкил этди. Ушбу маблағдан 8 млрд сўми республика бюджетидан ажратилди, 10 млрд сўми эса тадбиркорлар маблағлари ҳисобидан шакллантирилди.
Кўчада кенг пиёдалар йўлаклари барпо этилиб, замонавий ландшафт дизайни яратилди, фавворалар ва ёритиш тизимлари ўрнатилди.
Ҳозирда бу ерда 35 та савдо объекти жойлаштирилган бўлиб, уларнинг бир қисми туну кун ишлашга мўлжалланган. Кўча кунига 10 мингдан ортиқ аҳоли ва туристларни қабул қилиш имкониятига эга.
Давлат раҳбари кўча бўйлаб пиёда юриб, аҳоли ва тадбиркорлар билан суҳбатлашди.
Ўтган ҳафтада Шавкат Мирзиёев Нукусда бўлиб, у ерда ҳам ободонлаштирилган кўчани бориб кўрган эди.
Шу куннинг ўзида Президент Андижон вокзали яқинидаги янги йўл ўтказгични кўздан кечирди. Иншоот Бобуршоҳ кўчасининг икки қисмини бирлаштирди.
Қиймати 271 млрд сўм бўлган йўл ўтказгичнинг узунлиги 796 метрни ташкил этади, шундан эстакада қисми 596 метр, кенглиги эса 26 метрдир.
Хабар қилинишича, ушбу иншоот туфайли беморларни шошилинч тиббий ёрдам марказига 14 дақиқа тезроқ етказиш имконияти яратилди — йўналиш 15 кмдан 9,3 кмгача қисқарди.