Президент Администрацияси раҳбари Саида Мирзиёева бир вақтнинг ўзида Тошкент халқаро молия маркази бошқарувчисига айланди
Президент ўз администрацияси раҳбари Саида Мирзиёевани бир вақтнинг ўзида Тошкент халқаро молия маркази бошқарувчиси этиб тайинлади.
Президент Администрацияси раҳбари Саида Мирзиёева бир вақтнинг ўзида Тошкент халқаро молия маркази бошқарувчиси этиб тайинланди
Ўзбекистон Президенти Администрацияси раҳбари Саида Шавкатовна Мирзиёева амалдаги лавозимини сақлаб қолган ҳолда Тошкент халқаро молия маркази бошқарувчиси лавозимига тайинланди. Тегишли фармонни Президент Шавкат Мирзиёев имзолади, дея хабар берди унинг матбуот котиби Шерзод Асадов.
Бошқарувчи Молия маркази кенгашининг бош котиби ҳисобланади, кун тартибини шакллантиради ва раис бўлмаганда унинг йиғилишларини олиб боради.
Бошқарувчи фаолиятининг асосий йўналиши молия марказини ишга туширишни мувофиқлаштириш: биринчи навбатдаги ҳужжатларни тайёрлаш ҳамда давлат органлари ва марказ тузилмалари ўртасидаги ҳамкорликни йўлга қўйишдан иборат бўлади, дейилади хабарда.
Муҳим вазифалар қаторида молия марказининг Ўзбекистондаги ва хориждаги халқаро ташкилотлар, инвесторлар ва ҳамкорлар билан ўзаро муносабатларида вакиллик қилиш, шунингдек, кадрлар бўйича қарорлар қабул қилишда, жумладан, молия маркази маъмурияти ижрочи директори, унинг ўринбосарларини тайинлаш ва молиявий хизматлар бошқармаси раҳбарияти бўйича тавсиялар киритишда иштирок этиш ҳам кўрсатилган.
Бундан ташқари, бошқарувчи битимлар тузиш, ишчи гуруҳлар ташкил этиш ва экспертларни жалб қилиш ҳуқуқига эга.