Покистонда даҳшатли ёнғин: 15 нафар чақалоқ ҳалок бўлди

Покистонда юз берган даҳшатли ёнғин оқибатида 15 нафар чақалоқ ҳалок бўлди. Бу ҳақда Реутерс агентлиги маҳаллий нашрларга таяниб хабар берди.

Ёнғин 26-август куни эрталаб соат 07:00 атрофида Покистон Тиббиёт фанлари институти (ПИМС) қошидаги "Оналик ва болаликни муҳофаза қилиш" бўлимида бошланган. Қутқарувчиларнинг маълумотларига кўра, учинчи қаватдаги ушбу фожиали ёнғинга чақалоқлар хонасидаги кондиционернинг портлаши сабаб бўлган.

Ёнғин бошланган вақтда палатада 16 нафар янги туғилган чақалоқ бўлган, улардан фақат биттаси шифокор томонидан қутқариб қолинган.

"ББС Урду" хизмати касалхона расмийсидан иқтибос келтиришича, ёнғин кондиционер блокида бошланган ва кислород уланмалари орқали тезда тарқалиб кетган. Соғлиқни сақлаш вазири Мустафо Камолнинг таъкидлашича, ёнғин содир бўлган палатадаги чақалоқлар ё инкубаторларда бўлган, ёки кислород ускуналарига уланган.

Реутерс гувоҳининг сўзларига кўра, бўлим ҳудуди ўраб олинган ва касалхона биноси ташқарисида кўплаб тез ёрдам машиналари тўпланган.

**Ҳамма шокда**

Воқеа жойидан ББС мухбирларининг хабар беришича, касалхона ташқарисида ҳамон шок ҳолати ҳукм сурмоқда. Полиция кириш қисмида патрул хизматини олиб бормоқда. Ташқарида ўт ўчириш машиналари турибди, йўлакда эса сочилиб ётган тиббий ниқобларга синган дераза ойналари аралашиб кетган.

"Биз бўлим ёнида чақалоқларидан айрилиб, кўз ёши тўкаётган оилаларни кўрдик. Бир киши уч кунлик фарзанди нобуд бўлганини айтди", — дея хабар беради ББС мухбирлари.

Полициянинг маълум қилишича, ёнғинда ҳалок бўлган чақалоқлар қаттиқ куйиб кетган ва уларнинг шахсини ДНК тестлари ёрдамида аниқлаш талаб этилади. Фақатгина ДНК тестларидан сўнг жасадларни ота-оналарига топшириш мумкин, дейди полиция.